Dei ban leh homework shwa, ong u CM ïa ka VPP halor ka ishu aiwai ha Meghalaya House Kolkata

Shillong, Nailar 23 : U Myntri Rangbah ka jylla, Conrad K Sangma u la kyntu ïa ka Voice of the People’s Party (VPP) ba kadei ban da leh homework shwa halor ka ishu aiti ïa ka mala ba hakhrum jong ka Meghalaya House kaba don ha Russel Street, Kolkata sha kawei ka kompeni shimet ba tip kum ka MS/ Rocky Dhar, Umkdait Nongmensong, Shillong ban treikam na katei ka mala ba trai duh.
Haba kren bad ki lad pathai khubor ha kane ka sngi Balang, u Myntri Rangbah u la ong, “Kane ka jaka hadien ba la dep shna la shu ieh kumto khlem pyndonkam shuh.. hynrei phi kren pat ïa ka jingduhnong da ki klur tyngka ïa ka sorkar jylla,” u la ong.
Katkum ka jingong jong u, katei kadei ka jaka kaba biang bha bad kaba la dei ban aiwai naduh kham mynshwa. Nalorkata, u ong ruh ba ka sorkar Meghalaya Democratic Alliance 1.0 ha u snem 2019 ei ei ka la rai ba namar katei ka jaka khlem pyndonkam watla ka don hapdeng ka nongbah Kolkata, kumta ka long kaba sngewsih ba ki duh ei ïa ka khajna ïa ka jylla.
Shuh shuh u Myntri Rangbah u la ïathuh ba ïa katei ka jaka la dep ban khot tender paidbah khnang ba kino kino kiba khlieh dor heh kin ïoh.
“Kiba khlieh dor heh ki la ïoh kampher la kidei ki riewshimet A ne riewshimet B kam don eiei ïanga ban kynthoh hynrei ka mat kaba nga kwah ban ong ka long ba la dep ban bud ïa ki kyndon ba la buh bad uba ïoh ïa ka ruh dei uba khliehdor heh,” bynrap shuh shuh u Myntri Rangbah haba kren bad ki lad pathai khubor hadien ba la wai ka jingïalang ha nongbah Shillong.
Lah ban kdew hangne baka VPP ka la thoh da ka shithi sha u Myntri Rangbah ban dawa ba un tuklar lang bad pyndam noh ïa ka kontrak kaba la soi da ka tnad GAD (A) jong ka sorkar jylla ban ai ïa katei ka Commercial Complex jong ka Meghalaya House Kolkata sha ka kompeni.