Pynlong prokram ka JAS ka SC Laitnongkseh halor ka jingshah ktah na ka shongkha khynnah, POCSO, HIV bad Drok Shillong, Nailar :Ka Jan Arogya Samiti (JAS) jong ka HWC-Sub-Centre Laitnongkseh ha ka 22 tarik mynta u bnai ka la pynlong da ka jingpynshai paidbah halor ka phang kaba ïadei bad ka jingshah ktah na ka jingarmet khynnah (Teenage pregnancy), ka aiñ POCSO (POCSO Act), halor ka jingpang HIV bad Aids bad kumjuh ruh halor ka jingkyrni ha ki jingdih pynbuaid (drug abuse). Ha kane ka prokram ba la pynlong ha Laitnongkseh la wan ban ïashim bynta da ki skul bapher bapher jong ka thaiñ kiba kynthup ïa ka Wahnongkseh Upper Primary School, ka Laitnongkseh Upper Primary School bad ka Mawkahiar Secondary School, kata nalor ki SHG bad ki VO jong ki shnong kiba mar jan. Ki nongkren ba kyrpang ha kane ka sngi ki kynthup ïa u bah W. Kharpran uba dei u Block Programme Manager uba la kren halor ka jingtreikam jong ka JAS, ka VHC bad ka jingdon bynta kine ha ka imlang sahlang. Nalor kata la ioh ruh ka jingkren na u bah A. Shanpru Officer i/c. ka Sohiong Police Output ha kaba ula pynshai halor ka aiñ kaba teh lakam ïa ki kam thombor ïa ka longrynïeng jong ki khunlung khynnah kaba tip kum ka POSCO Act. La pynshai ruh hapdeng ki khynnah samla, longkmie longkpa ba kim dei ban shongkha khynnah ne ban pynshlur ban shongkha khynnah namar kane ka long kaba beaiñ bad kaba lah ban ngat ha ki jingpynshitom ba pyrkhing jong ka aiñ. Ha ka juh ka por, u Bah A. Shanpru ula kyntu ruh ba ym dei ban thombor ïa ka longrynïeng jong ki khynnah bad kiwei kiwei ki jingpynshai kiba ïadei bad ka tei ka aiñ. Kiwei pat kiba la ai ïa ki jingpynshai ki kynthup ïa I kong P. Nongkhlaw (PHN) iba dei i nongtrei jong ka Sohiong CHC i ba la pynshai halor ka jingeh jingmynsaw na ka jingshongkha khynnah bad jingarmet ha ka por ba dang rit ka rta. Kumjuh ruh na ïoh ka jingkren pynshai na u Bah J. Pohtam (MACS) bad i kong G. Jyrwa kiba la pynshai halor ka jingpang HIV bad Aids bad ka jingma na ka jingdih ïa ki kynja jingdih pynbuaid bad u drok. La pynshit pynshngaiñ ïa kane ka prokram da ka jingrwai na ki khynnah skul jong ka Wahnongkseh Upper Primary School bad ka jingshad Zumba na i kong L. Majaw (MLHP) bad i paralok. Ha kane ka sngi la don lang ruh ki dkhot jong ka Executive Dorbar jong ka Shnong Laitnongkseh kiba kynthup ïa u bah Dhotding star Nongbri (Secretary Shnong), Bah Purningstar Shabong (Assistant Secretary Shnong) bad kiwei kiwei. La pynïaid ïa kane ka prokram da u Bah Diber Shabong uba dei u Chairman ka JAS uba dei ha ka juh ka por u Rangbah Shnong jong ka shnong Laitnongkseh.