Mar syn shimti kane ka Sorkar MDA hangne ha jylla jong ngi, ki paidbah ki khmihlynti shisha bad don jingkyrmen ruh ïa kane ka Sorkar khamtam ba la ïalam da u Conrad Kongkal Sangma uba long u khun rangbah jong uwei na ki nongïalam bakhraw ha ka saiñhima sima u (L) P.A Sangma. Ki paidbah ki kyrmen shisha ïa ka lawei ba phyrnai ha ki liang baroh.
Phewse, ka jingangnud bad jingkyrmen ki paidbah ka la kylla long pynban da khongpong hadien ba kane ka Sorkar MDA hapoh ka jingïalam jong ka NPP ka la treikam mynta kumba saw snem tam ei ei. Don bunbah ki jingdkhoh bad jinglehbor bad thombor ba kane ka Sorkar ka la shukor, shimkabu bad hikai bakla pynban ïa ki paidbah ba bun balang.
Ka ishu ILP bad Ktien Khasi bad Garo la dep mynjur da kane ka Sorkar ha Assembly ban pynkmen bad pynshongshit ïa ki paidbah bapli ha kito ki por, hynrei, kane ka mat ILP ka la sdang ban lip noh pynban bad ka mat ban pynrung ïa ka Ktien Khasi ha ka Khyrnit Baphra ka la pynkylla pynban sha ka ktien Hindi mynta.
Kine ki nongsynshar ki nang ban leh buit tuh hakhmat u paidbah hynrei nadien pat ki tynrah da kumwei pat.
Kat ka jingmynjur solonsar da ka Assembly baroh kawei khlem lerkam ka la long shisha ka jingshah rkhie beiñ hakhmat ka pyrthei baroh. Hynrei, kine ki nongïalam pat ki ladep kam trai lypa ba ki paidbah ki dei lypa ki nongkynti jong ki bad, hana, ba kin jop lut ïa ki Seat baroh na manla ki Constituency jong ka jylla ha ka Election 2023.
Ka mat ban pynkynriah ïa ki Harijan ha Them Iew Mawlong kaba ki kular ha kato ka por ban pyndep ne pynkut tang hapoh shibnai, mynta pat ki la sdang leh kyllaiñ jelabi khnang ban tep eitmiaw ïa la ka iwtung hakhmat u paidbah. Katba batai ma ki (namar kim dei ki biej), ki paidbah kin shu sngewdei lut nadong shadong. Ka kam aiu kata ban shu ai jaka ei hapdeng sor (European Ward) Shillong da ki phew akar sha ki Harijan bad ban pynshna ing lem ruh ïa ki da ki 300 ing tam ei ei ïa ki. Ka jingïakhih ha ka por ba shah siat ïap u Bah Che (Cheristerfield Thangkhiew) kaba ima bad i shyrkhei bha hynrei ki nongïalam kane ka Sorkar ka pyneh hi triang ïa ka sur u paidbah bad mynta pat, bun ki la sdang sa ban ‘ïa bam bad ïa nguid pat ïa la prie lajong’ namar ka jingshalak bad jingsian buit jong kine ki nongïalam kane ka Sorkar MDA.
Kane ka Sorkar kam ju salia bad kam ju sngap satia hi ruh ïano ïano wat ïa u paidbah hi ruh,i kumba kam dei ka Sorkar ba la jied da u paidbah (elected govt.).
Dang shen, mih sa ka mat khaii be-aiñ ïa u dewïong bad kane ka pisa,don kiba ong, ba, la pyntuid shaduh Manipur, Assam bad kiwei kiwei ban pynjop elekshon ïa ki katto katne ngut ki MLA hangto. Lada kata ka dei shisha, kata, ka pisa ka jylla la pynlut bad pyndonkam pynban sha kiwei pat ki jylla ha ka jaka ban pyllut (invest) ha la ka jong ka jylla lajong.
Ki kam khappud lei kaba i shyrkhei bha. Kat kiba mut ban pyndam ne ïaleh pyrshah ban pynphai biang ïa ki jaka ba la ïohei da ka Assam sha Meghalaya kin shah ñion bad shah leh kput haban da jem jai artad. Wat ka District Council kaba dei ka bor ban pynneh pynsah bad ïada ïa ka hok longtrai ki nongshong shnong ïa ka khyndew ka shyiap ruh kim shah satia ba kan ïaleh pyrshah ïa kaba la dep rai.
Lada dei shisha ba kita ki MDC ki ïa kylla ktien ne kylla jutang shisha kumba thoh ha ki kot khubor, kata, ka long kaba ma bha. Kaba kham shyrkhei eh ka dei ka jinghikai bakla jong ki nongïalam jong kane ka Sorkar ïa la ki MDCjong ki hapoh ka jingïalam ka party NPP namarba tang shi sngi ar sngi la phah kylla ktien bad phah kylla jutang noh ïa ki jingïarai jong ki.
Ban kylla ktien ne kylla jutang ym tang ba ka bam bad dait kylla ka ktien bad jutang hok hynrei ka long ruh kaba sang ïap sang im bad kaba ma hi ruh hadien habud ïa ka lawei jong ki, ïa ka ing ka sem jong ki baroh lada ki leh shisha kumta.
Sa ka jingwanrah jong ki ïa ki kam ïa Khalai (gambling) ha kane jylla tipbriew tipblei jong ngi ka la phalang lypa shaei kane ka Sorkar ka thmu ïa ka jylla jong ngi.
Hynrei, donbok ba ki nongïalam Niam bapher bapher ki pyrshah lut ban pynlong kam ïa khalai ïa kane ka Jylla jong ngi namarba baroh baroh ki tip kum ka “Christian State.”
Lada ka Christian State kan sa kylla long noh kum ka Gambling State kan long lypa ka jinglehraiñ hakhmat ka pyrthei. Wat la ki kynhun Niam ki dawa pyndam ïa katei ka aiñ, ki nongsynshar pat kin nym sngap satia hynrei kin ïaid beit shakhmat kumba ki leh ïa ka ka sur u paidbah ha kito ki por bad ki nongïakhih khappud mynta.
Ha ki kam ki jam ba pynïaid ka Sorkar, ki nongïalam Niam kin hap hapoh kine ki nongsynshar pyrthei ( Ministers) hynrei, ha ki kam Niam pat, kine ki Nongsynshar pyrthei kin long hapoh kine ki nongïalam Niam. Ngin dang ïa peit shwa, jop ne pyndem ki Politician ha ki nongïalam Niam ne pyndem ki Nongïalam Niam ha ki Politician halor kane ka kam ïakhalai.
