Ka jingkiew dor u nar rodm, ka tin, ka dewbilat ki la ktah haduh katta katta ïa ki paitbah ba shna ïing

Nongstoiñ, Jymmang, 04: Ka jingkiew dor jong u nar rod, ka tin, u prek bad baroh ki mar nar ka la ktah haduh katta katta ïa ki paitbah khamtam ha West Khasi Hills.
Kane ka jingkiew dor ka la ktah ruh ïa ki Kontraktor kiba trei ïa ki ba bun jait ki jingtrei kiba hap ban pyndonkam da u nar rod, u prek, ka dewbilat bad kiwei kiwei.
Ha kaba ïadei bad katei ka jingkiew dor kynsan jong ki mar nar u Bah B.Marngar uwei na ki riewrangbah na ka thaiñ Nongstoiñ haba ïakren bad u Nongthohkhubor u la ong ba kane ka jingkiewdor kynsan jong u nar rod bad kiwei kiwei ki tiar nar ka dei hadien ka jingwan lynshop jong ka khlam jingpang COVID-19 ha kane ka jylla bad satlak ka pyrthei.
Nalor kata, u la ong, haba phai ha ki snem bym pat wan lynshop ka jingpang COVID-19, u nar rod u dang poi tang saw hajar tam shi kwintal, ka tin ka dang poi tang lai hajar shiteng shi ban, u prek u dang poi tang san phew haduh hynriew phew tyngka shi kilo hynrei naduh u snem 2021 u nar rod uba saw hajar shu kwintal u la kiew phra hajar shi kwintal. U pre uba san phew tyngka shi kilo u la kiew phra phew haduh shispah shi kilo.
U la ong ba ha u snem ba ladep ka Petrol ka dang kiew tang haduh hyniewphew ar haduh hyniewphewsan tyngka shi litar katba ha une u snem 2022 haduh mynta ka petrol ka la kiew haduh shispah sawtyngka hynriewphewhynriew naïa shi litar.
U la ong ruh ba kiwei pat ki mar ki la kiew ka dor tang ba ka jingkiew ka long tang khyndiat.
Haba bynrap halor ka jingkiewdor jong ki tiar nar u la ong ba kito kiba ïoh jingtrei kontrak kum ïa ki jingkieng, ki jingtei ïa ki ïng Sorkar bad kiwei kiwei ki kam kiba hap ban pyndon kam da u nar rod, u prek bad ka dewbilat kin ym nud shuh ban trei namar lada trei tang dep ruh ym long lada trei bha ruh ïa ka jinglut la hap ban sei na pla ne pan da ka ram ka shah.
Uwei pat u rangbah u la ong, haba phai ha ki arsnem ba ladep wat hapdeng ka jingkhangdam ki paitbah kim da khuslai than namarba ka Sorkar India bad ka Sorkar Jylla lem bad ki kynhun bapher bapher ki pynbiang nadong shadong naduh u khaw, u dai, ka shini, u phan, ka umphniang bam bad kiwei kiwei ki poi ha manla ki shnong bad ki thliew ïng.
U la ong ba ki paitbah ki ïakmen tohhoh hynrei kim sngewthuh pat ba ka Sorkar u Modi ka ai hynrei ha kajuh ka por ka kjit kylla pat da kawei ka rukom kata da kaba pynkiew dor ïa ki mar ki mata.
Shuh shuh u la ong ba lada kheiñ tang na ka jingkiewdor jong ka Petrol bad ka Diesel namar ka kiew khyndiat pa khyndiat bad lada ka Sorkar ka oh khajna tang shityngka na ka shi litar na ka Petrol bad shi tyngka na ka Diesel ka mut ba ha ka shisngi tang na ka jylla Meghalaya da ki hajar klur tyngka ka lah ban ïoh lum.
Watla katta ruh u ong ba kaba lyngoh ka long ba kane ka Sorkar MDA tang ïa ka tulop ki nonghikai ruh kam lah ban siew, nangta kiwei pat ki nongtrei ha ki tnad Sorkar ki ud ba ka Pla Pisa jong ka Sorkar ka thylli.
“Ka jingkylli kaba mih mynta ka long, nalor ba ki tiar nar ki la kiew haduh mar shiteng ka dor haba ïanujor bad ki snem ba ladep nangta kiwei kiwei pat ki khajna kum ka GST bad kiwei kiwei shaei ka Sorkar ka buh ia ka pisa. Ha ka jingshisha lada ka khajna ka bun ka Sorkar kam dei ban kyrduh,” u la ong.