Nongstoiñ, Jymmang, 04: Kum ka jingïasnohkti lang ha ka North East Festival 2022 bad ka Azadi Ka Amrit Mahotsav ka ophis jong u Sub-Divisional of School Education Officer (SDSEO) Nongstoiñ ha ka sngi Balang ka la pynlong ïa ka jingïakop shut jabieng ha Anderson Higher Secondary School, New Nongstoiñ.
Ha kane ka jingïakop shut jabieng la ïashim bynta da ki khynnah pule jong ki shiphew tylli ki skul kiba kynthup ia ka Sibsing Memorial Government Higher Secondary School, ka Anderson Higher Secondary School, ka St. Peter’s Higher Secondary School, ka KJP Synod Sepngi Higher Secondary School, ka Joel Gatphoh Memorial Higher Secondary School, ka St Francis Higher Secondary School, ka Umyiap District Higher Secondary School, ka Christ King Higer Secondary School, ka Ri Lyngam Presbyterian Higher Secondary School, ka Pastorate Laitkseh Higher Secondary School
Ia ka prokram la pynïaid da ka SDSEO jong ka West Kasi Hills ka Kong L.Syiemlieh.
Shwa ban sdang ia ka jingiakop, la pynshai halor ka jingrakhe ïa ka North East Festival bad ia ka Amrit Ka Azadi Mahotsav da ka Joint Director of School Education & Literacy, West Khasi Hills ka Kong R.Kongwang kaba la long kum ka Kongsan.
Ha ka jingpynshai ka Kong Kongwang ka la ong ba kane ka prokram ka long ruh kum shibynta ka jingrakhe ïa ka jingdap hynñiewphewsan snem jong ka jingïoh laitluid jong ka ri India na ka jingsynshar ki Phareng.
Ha kane ka sngi ki khynnah skul ki la ïa shimbynta shitrhem ha kaba jubab ïa ki jingkylli bad ki don katto katne ki jingkylli ba baroh ki khynnah skul kiba ïashim bynta kim lah satia ban jubab bad wat ki paitbah kiba ïadonlang ruh kim lah bad la lap ban jubab da ki nongkylli jingkylli.
Hadien ba la kut ki kynta kylli jingkylli napdeng ki shiphew tylli ki skul kiba la wan ban ïashimbynta ka St. Peter’s Higher Secondary School ka la wan hakhmat duh ha kaba kala khur haduh 160 points bad ïohrah ïa ka khusnam da ka song pisa kaba T.7 hajar ryngkat ka Trophy. Ka Anderson Higher Secondary School ka la jop ïa ka kyrdan kajba ar da kaba ioh khur 135 points bad ïoh khur ïa ka khusnam da ka song pisa kaba T.5 hajar lem bad ka Trophy bad Joel Gatphoh Memorial Higer Secondary School kaba wan ba lai ka la ïoh khur ïa ka khusnam da ka song pisa kaba T. 3 hajar lem bad ka trophy.
