Naei ki Karbi ki ïoh ïa ka Shad Niam Chomakan jong ki

La bun bun sien ba nga pynpaw haki jingkren ne jingthoh jong nga shaphang kata ka Chomangkan jong ki Karbi. Te mynta lyngba jong kane ka jingthoh ngan ïathuh ïaphi ba kumno bad na ei ki Karbi ki ïoh ïaka Chomangkan jong ki. “Chomangkan” kamut ka, “Shad Pnar” Chomang kamut Pnar, ba ki Karbi ki khot sin ïaki Pnar bad Kan kamut Shad kumta Chomangkan kamut ka Shad Pnar.
Ka Chomangkan ka long ka Shad Ñiam bad haka juh ka por, ka don jingïadei ruh bad ka Riti ka Dustur jong ki Karbi. Bad mynta ki tip bad khreh ban pynkylla Kyrteng noh ïaka naka, “Chomangkan” sha ka, “Chomkan”. Chomkan kamut ka Shad Sa-ngia haka ktien Pnar. Ka shad ne lehñiam kaba ki leh haka jingïadei bad ki mynsiem kiba la khlad noh, kum ka phur ka siang, ka thep shyieng ne thep mawbah ha ngi ki Khasi Pnar.
Ngam sngew donkam ban batai bniah ba kumno ki Karbi ki leh bad ki pyndep ïaka kñia ka khriam, ka siang ka pha, neka ñiam ka rukom haka ta ka Chomangkan jong ki. Kaba donkam ïangi ban tip ka dei na ei bad kumno ki ïoh ïa kane ka Shad.
Kat kum ki jingtip kiba nga la ïoh lum naki ba bun ki jingïathuh khana, la shem ba ïaka ne ka shad la pynlong nyngkong eh ïaka daka briew kaba kyrteng ka Ksoo Lyngdoh naka Raid Labang jong ka Elaka Labang Nangphyllut. Kane ka Ksoo Lyngdoh ka long ka briew kaba riewspah bha bad kaba khlaiñ bad skem ki jingmut jingpyrkhat, wei baka la mut la thmu ban leh bad pyndep te kam juh randien hynrei ka tur beit. shaphrang.
Ym lah ban tip ïaki snem ki bnai, hynrei la ong ba ïakane ka Shad la pynlong ha kawei ka jaka kaba don ha khap jong ka wah Myn-i bad wah Umphe kmai (kane ka jaka mynta ka hap shapoh u pud u sam jong ka shnong Karbi kaba kyrteng ka Umpilangso) ha duh mynta mynne ïaka ne ka jaka latip kyrteng kum ka Madan Shad ka Ksoo Lyngdoh.
La ong ba hakata ka por, ki Labang Nangphyllut kim pat don pura laka Ñiam ka rukom ka Riti ka Dustur, kumta ka jingmut jingthmu jong ka Ksoo Lyngdoh haka ba pynlong ïaka ne ka shad ka long ban seng ban buh ïaka Ñiam ka rukom ka Riti ka Dustur jong ki Labang Nangphyllut.
Ka jingpynkhreh ïakane ka shad ka long kaba phylla shisha.
La ong ba naduh kata ka por ki pynkhreh haduh 40 mon lane 16 quintal u khaw tang ban shet kyiad pyrsi kumba ong haka ktien Pnar jong ngi te ka harak bad ka sidhiar. Kat ki jaitdoh kiba bam u khun bynriew te la don lut. Ka ja ka doh ka kyiad ka um u kwai u tympew ka khooner khoojem (shira) ki soh ki paid kumba long ka rukom khreh bam u Khasi haka por lehñiam leh rukom.
Ïa ka jaka shad la pynkhuid haka wei ka madan kaba don hapdeng ka shka jong ka wah Myn-i bad wah Umphe kmai (mynta kane ka jaka ka don hapoh jong ka shnong Karbi kaba khot Upilangso) ïaka ne ka madan la siang da u shyiap um uba ki khar na wah Mynriang bad wah Myn-i. Ïa u ne u shyiap la kynruh bad sait haduh ban da khuid bha haduh ban ym bit tngit shuh haba shong halor jong u, nangta latheh bad siang ha madan. Bad haduh mynta kane ka jaka ka dangkylla madan shyiap naduh kata ka por.
Kane ka shad kamdei kaba la don lypa ka kyrteng jong ka shad lane ka rukom shad bad kumno ban shad ïaka. Ka jingthmu jong ka Ksoo Lyngdoh haka ba pynlong ïakane ka shad ka long naka bynta ban thaw thymmai lane ban buh ban seng thymmai ïaka shad kaban long ka riti dustur jong U Khun Khasi Pnar haka jait Labang Nangphyllut.
Kumta kila khot la wer ïaki Daloi ki Pator ki Kñi Waheh ki Sangot ki Maji bad ki Tymmen ki san ban ïa shong pyrkhat bad ban pynshong pynthiah lane ban thaw ïaka ta ka rukom shad ka rukom rwai ka rukom tem ka rukom pud ka rukom riam rukom beit bad ban khot ban jer ïaka kyrteng jong kata ka shad ka ban sa neh junom pateng la pateng haka riti ka dustur jong ki Labang Nangphyllut.
Kumta daki taïew ki bnai kine ki riew rangbah kila don lang haka ne ka jaka ban ïa shong pyrkhat halor kane ka kam. La khot la wer lang ruh ia baroh ki khun samla kynthei bad shynrang hakane ka jingpynkhreh naka bynta ban hikai ïaki kumno ban rwai ban siaw ban riam ban beit ban pud ban tem bad ban shad.
Ki khun samla na baroh ka Elaka ruh ki la ïawan lut sha kane ka jaka naka bynta kane ka kam. Bad kila ïashong ïasah bun sngi bun taïew naka bynta ban pynkhreh ïaka ne ka shad thymmai.
Haba la dep ka jingpynkhreh nadong shadong, la rai ban pynpaw pyrthei noh ïakane ka shad thymmai kaba la buh la seng hapoh ka Raid bad ka Elaka. Te kila ïa khot ïawer lang ïaki lok ki jor na jan na jngai, la ong ba kila ïawan naduh Nartiang Raliang bad ka Khynriam, nangta saki Ahomia (Assamese) bad Mikirs (Karbi).
Hynrei sngewsih ban ong ba haka miet shwa ban sdang kane ka shad, ki khun samla bad rangbah kiba don hakane ka shad ki ïadih ïakata ka kyiad, ka harak ka sidhiar bad ki la buaid khawïang haduh ba kim ïashai ne ïatip briew shuh. Kumta kila ïamih lymbung shaka ta ka madan kaba la pynkhreh bad kila ïa shad kynthei shynrang ha ryngkat bad ki jingrwai ki jingphawar daki ktien sih ktien sang suda ha ryngkat ka kynhoi bad ka risa.
Haba kita ki Daloi ki Pator ki Sangot ki Maji ki Tymmen kisan ki ïoh sngew ïakane te ki sngew rem bad sngewlehraiñ halor ka ka jingleh bad kila pynpep ne pynduh pyndam noh syndon ïaka ne ka shad khlem da pynlong shuh ïaka.
Hynrei la ong baki Mikir (Karbi) kiba ïadon lang haka ne ka por ynda kila ïohi ïaka ne ka shad bad bala kyntaid noh daki Labang Nangphyllut te kila shim noh shaki bad ki ai kyrteng noh ïaka ka “Chomangkan” kaba mut ka Shad pnar kumba la ïathuh haneng.