Kwah ka Myntri ba ka Shillong Medical College kan dei pura jong ka Sorkar ym shuh ka PPP mode

Shillong, Naitung 25 : Ka Myntri ka tnad ka Koit ka Khiah jong ka sorkar jylla, Kong Ampareen Lyngdoh ha ka sngi Nyngkong ka la ong ba ka sorkar ka pyrshang ban pyntikna ba ïa ka Shillong Medical College kan dei beit pura kaban dei trai beit da ka jylla.
Da kaba pyntip ba ka jingpynkhreh na bynta katei ka college ka la ïaid shakhmat ka Myntri ka ong ba ki don ruh ka jingkyrmen ba ka Shillong Medical College kan dei noh pura jong ka jylla ym shuh da ka PPP mode ne kiwei kiwei.
Ka Myntri ka ong ruh ba ka sorkar jylla ka hap ban long shai bha naduh ka sngi ba ka pynbna ban pyntreikam noh ïa ka medical college la ka jong ba kan long kaba la biang ban pynïaid na ka bynta san snem khlem pat don jingmih da kaba maham lym kumta kin ym pat ïoh doktor ha ki san snem ban wan.
“Da kaba buh hakhmat ïa kane nalor kiwei pat, ngi shim ruh ïa ka por ban pyntikna ba lada ka jylla Meghalaya ka pynban la ka jong ka medical college, kumta ki hap ban long kiba la pynkhreh ban shim ïa ki bhah pule doktor lym kumta ngin sa duh noh ïa kata ruh,” ka la ong.
Shuh shuh ka la ong ruh ba ka sorkar ka don bun bha kiei kiei ha ki jingthmu, ka Myntri ka la ong ba ki la dep ban maitphang ruh katto katne ki bynta jong katei ka jingthmu da ka jingkyrmen ba kin lah ban ïai neh lada ki ïoh ban don noh la ka jong ka medical college.
Haba jubab halor ka jingkylli, ka Myntri ka la ong ruh ba kim pat ong ei ei halor ka PPP mode namar ki jaka pule shimet ki don la ki jong ki jingeh ba ki paidbah ki kynduh.
“kum ka nuksa, ka jingsiew kan dei kaba eh bha, kumta bun ïa kine ki ishu dei ban pynbeit shwa ban shim ïa ka rai halor kitei ki medical college, ai por shwa ïangi,” ka la bynrap biang.
Ha kajuh kapor ka la pan jingtip ruh halor ka jingtei ha Umsawli ha kaba ka la tyrwa ban sdang ïa ka Shillong Medical College hadien ba la mih ki khubor ba katei ka jaka la shu ieh kumto bad la heh sa tang ki phlang ki kynbat.
“Nga la kylli ïa ka tnad ba kin phah ïa ka kaiphod kaba pura ïa kaei kaba la jia baroh ha Umsawli ha kane ka por,” ka la bynrap biang.
Ha kajuh ka por ka Myntri ka la pyntip ruh baka jingtei ïa ka Tura Medical College ka la ïaid shakhmat.