Shillong, Naitung, 23: Ka Employment Monitoring Cell jong ka Khasi Students’Union (KSU) ha ka sngi Palei ka la phah da ka dorkhas sha u Myntri Rangbah ka Jylla Conrad Kongkal Sangma ban pynbeit mardor halor ka thungkam thungjam ha Post Office na bynta ka post Gram Dak Sevak (GDS), Asst. Branch Post Master (ABPM) vad Branch Post Master (BPM).
Ha ka dorkhas ba la soi da u Chairman jong ka Employment Monitoring Cell u Bah Rueben Najiar bad u Secretary u Bah Manly Nongpluh, ka seng ka la kam ba ha ka jingwad bniah ka la lap ba manla ka por ba ju lait ki kam ha Post Office, kiba bun ki dei hi ki bar jylla kiba ïohkam namarba ki kyndon ban ïohkam ki long kiba dei ba nang ïa ka ktien Phareng bad Hindi bad kane ka long kawei na ki daw kaba long diengpynkiang ïa ki paidbah jong ka jylla.
“Watla na ka liang Seng ka la kyntu ïa ki bor pynïaid halor kane bad u Myntri Rangbah u la thoh sha ka Ministry of Communication, ka Sorkar Pdeng halor kane ka bynta bad yn sa pynrung ïa ka ktien Khasi bad Garo. Hynrei ka Seng ka lap ba kane kam shym la ïarap namar ba ym pat weng ïa ka ktien Phareng bad Hindi bad bun ki bar jylla ki ïoh beit ban aplai bad ka jingïoh marks kham bun ha ka Matric ka pynlong ïa ki ban shah jied ha ka Merit List bad kane kam ïahap satia ban shu jied tang da da kaba pynshong nongrim na ka Merit List khlem pynshong nongrim pat ïa kiwei ki bynta,” la ong ka seng.
“Na ka liang ka Seng ka ïaiban ba kine ki Post dei beit ban ïoh da ki trai jylla namarba ka kam kan kham suk ha kaba ïadei bad ka ktien ka thylliej bad ka jingtip ki jaka bad ki briew kiba wan nabar kin eh bad pyntyllun ïa ka kam,” la ïai ban ka seng.
“Ka Seng ka dawa ïa u Myntri Rangbah ka Jylla ba u dei ban pynbeit ïa kane ka kam bad ba dei ban weng noh ïa ka ktien Phareng bad Hindi bad ba dei ban pynrung tang ïa ka ktien Khasi bad Garo khnang ba ki trai jylla kin ïohkam ïohjam ha Post office,” la dawa ka Seng.
