Bun kiba la shah thok shah shukor lyngba ki kor ki bor jong ka Internet: Hahshah

Mawkyrwat, ‘Naitung, 23: Kum shibynta ba ki khynnah skul ki lah ban tehlakam ïa ki jingshah thoh shah khukor lyngba ki kor ki bor jong ka Internet, ka ophis District Legal Service Authority (DLSA), South West Khasi Hills District ka la ïoh ban pynlong ïa ka prokram ai jingpynshai kumno ban tip halor ka jingsniew lyngba ki Internet bad ki bor Computer ba la tip ruh kum ki ‘Cyber Crime’, ha kaba ïa kane la pynlong ha Mawranglang Presbyterian Secondary School, Mawranglang, South west Khasi Hills District.
Ka kong Nosmi Hahshah, Chief Legal Aid Defence Counsel jong ka District Legal Services Authority (DLSA), South West Khasi Hills District haba kren ha ka jingïakren ba lyngkot ka la kren bad ai jingtip ha ki khynnah skul halor ka ‘Information Technology Act’ bad ka ‘Juvenile Justice Act’ ba kum ki khynnah skul ki dei ba tip bad kumno ban leh nangne shakhmat.
Ha ka jingkren jong ka, ka la ong shuh shuh ba ha kine ki juk ba mynta shibun kiba pynbiej bad ki nongshukor ki dei ki briew ki la pyntbit ïa lade lyngba ki kor Computer ban ïoh ban thok bad ban shukor ïa ki paidbah da kaba ki ki pyndonkam lyngba ki Internet ban pyngnop ïa ki briew. Ka la ong ruh ba ha kine ki sngi, bun ki briew ki la shah pyngnot ruh wat lyngba ki number phun, ki WhatsApp, ki Facebook, ki apps bapher bapher da kita ki nongshukor ne thok ki da pynbiej ha kita ki nongpyndonkam da kiba bun rukom.
“Don ki briew kiba thok da ki phun ban ong ba ki card ATM jong phi ki la kut, te ka la dei ka por ba phin pynthymmai noh, bad kita ki nongphun kin ong ba phin ïathuh ïa u number card bad ki lah ban pan ruh ïa u Pin Number ban shukor”, ong ka kong Hahshah. Namarkata, ka la kyntu ïa ki khynnah skul ba ïa kiba kum kine wat ïathuh ei ei ruh em halor ki kam ba ïa dei bad ki bank namar ki shukor bad ïa ki PIN Number ruh wat napoh bank ruh kim ju kylli.
Ka la kyntu ruh ba kum ki khynnah skul, ha kum kine ki juk ba mynta ki dei ban long kiba stad ban pyndonkam ïa ki mobile phun lynba ki internet bad ïa ki Computer bad kiar ban ïathuh lut ïa ki jingdonkam shimet khamtam ha kaba ïa dei ki jingdonkam ha ki Bank Account ne ki jaka kynshew pisa ki jong ki, maham ka kong Hahshah.
Ïa ka jingïalang ha kane ka sngi la pynïaid da Principal jong ka Mawranglang Presbyterian Secondary School, u babu B.P Nongsiej, u babu A. Lyngdoh uba la ai ki kyntien pdiang sngewbha bad bud sa ka jingkren khublei na uwei u nongtrei hapoh ka ophis District Legal Service Authority (DLSA), South West Khasi Hills District.