SSA Women’s League 2023: Lyngba ka penalty jop ka Mawlai ïa ka PFR Accademy, haduh 4 kol pynliem ka Laitkor ïa ka Lumparing

Shillong, Naitung 22: Ki thei jong ka Laitkor SC ryngkat bad ka Mawlai SC ki la ïoh ban ïatyngkhuh biang sa shi sien hadien ka final jong u snem 2022 da kaba khur namjop ha ki jingïakhun semifinal jong ka Shillong Sports Association’s Women’s League 2023 kaba la long ha SSA Stadium, First Ground, Polo, hynne ka Sngi Saitjaiñ.
Na ka liang jong ka Laitkor ka la hap ban wanphai da kaba tyngeh hadien ba shah lamkhmat da shi kol ban pynliem ïa ka Lumparing SC haduh 4-1 katba ka Mawlai ka la khur ïa ka namjop lyngba ka jingïashut ïa ka penalty da 4-2 pyrshah ïa ki thei ka PFR Football Academy hadien ba ki la ïakhaid da mar 1-1 wat hadien ka extra time.
Kumban shu pynkynmaw, la 29 tarik mynta u bnai, kine ki ar kynhun kin sa ïoh ban ïatyngkhuh biang sa shi sien kumba la long ha ka final jong u snem 2022, ïa kaba ka Mawlai ka la jop da 2-1 kol ha ka extra time. Mynta ka final ruh yn sa pynlehkai ha SSA Stadium bad ka ban sdang ha ka por 3:30 baje janmiet.
Ka Catherine Kharkongor ka la ïoh ban pynkhihjar nyngkong na ka bynta ka Lumparing tang hadien ba la jam sha ka 15 minit. Kane ka dei ruh ka kol kaba ar ba ka Laitkor (kaba la jop baroh lai sien ki jingïalehkai Group Stage mynta ka samoi) ka la shah thep ha kane ka samoi ba mynta.
Hadien ba la shah lamkhmat, ka Laitkor ka la sdang ban wanphai da kaba tyngeh, lyngba ka Nisilia Majaw kaba la lah ban lehkaibha ban shna ïa ki kabu bad kaba long ka jingma ïa ki bak jong ka Lumparing shuwa ba ka Iaraplang Nongrum (35’+2) kan sa ïoh ban pynïakhaid.
Ka Laitkor were ka la ïoh mynsiem bad bteng ban pynkhlaiñ ïa ka rukom lehkai ha ka kylla kaba ar, ban tehlakam ruh ïa kane ka jingïakhun.
Tang hadien katto katne minit ba la ïaid ka kylla miet, ka Majaw ka la ïoh ban ïarap pynbuh bol na ka bynta ka Iaraplang ban thep sa ïa ka kol kaba ar na ka bynta ka Laitkor bad ruh ba lamkhmat kylla ha ka 55th minit jong kane ka jingïakhun.
San minit hadien katei ka kol, ka Saralin Warlarpih (60′) ka la ïoh ban pynbud sa ïa ka kol kaba lai na ka bynta ka kynhun shuwa ba ka Iaraplang kan sa ïoh ban thep jlang ïa ka hat trick ha ka 64 minit.
Hadien kane, ka Lumparing ka la sdang ban ïoh tehlakam biang ïa ka bol haduh kaba kut jong ka minit, hynrei ka por ka lyngkot eh bad ka Laitkor, ka la pyneh triang ban jop da 4-1kol. Ka thei ïalehkai kaba la ïoh khyrwit ïa ka Hat-trick, ka Iaraplang ka ïoh ban khur ïa ka khusnam Player of the Match.
Haba phai sha kawei dei ka jingïakhun semi final hapdeng ki thei ka Mawlai pyrshah ïa ka PFR, kaba la long shisha ka jingïakhun kaba mar ïabam bad dei satang ka tiebreaker kaba la lah ban pynïakhlad ïa ka Mawlai bad ka PFR.
Ka kynhun ba bat ïa ka burom kum ka lahduh ka la sdang ïa kane ka samoi khlem jingsalia hynrei ka la ïakynduh mawsiang hakhmat ka PFR, kaba la pynpaw ïa ka sap bad ka dei kawei na ki kynhun na ka thup jong ki saw kynhun ba wan hakhmat.
Ha kane ka jingïakhun, baroh ar kynhun ki la ïoh markylliang ki kabu ban pynkhihjar bad ruh ïoh ban thep mar kawei shuwa ban kut ka kylla step. Dei ka Mawlai lyngba ka Marbarin Nongrum ha ka minit ba 19′ kaba la pynlong ïa ka kynhun ban ïoh lamkhmat da shi kol ïa ka PFR.
Hynrei watla kata ruh, ka PFR ka la ïoh ïa ka kabu lyngba ka free-kick kham pajih na ka kol, hynrei kane kam shym la long ka jingthut na ka bynta ka Betsheba Kharsyntiew (22′) kaba la shut beit shapoh kol jlang lyngba kane ka free kick kaba la pynïakhaid ïa kane ka jingïakhun da mar 1 kol.
Watla ki la don katto katne ki kabu na baroh arliang mamla hynrei ym shym la don satia ba lah ban pynkhihjar kaba la ïalam ïa kine ban jam sha ka jingïashut tie breaker. Bad dei ha ka tie breaker ba ki thei ka Mawlai ki la lah ban jop da 4-2, bad ïa ka namtam ha kane ka jingïalehkai (Player of the Match) la khur da ka Marbarin.
Ka jingïakhun na ka bynta ka namlahduh kan long ha ka 29 tarik.