Jowai, Naitung 16: Ka jingïakhun kaba nyngkong jong ka lympung ïalehkai 3rd U Adelbert Laloo Memorial Trophy jong ka kyrdan 3rd Division Football Tournament 2023, ba la pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium, Dongmihsngi Jowai hapdeng ka Nangbah Mooknor pyrshah ïa ka Luti Tuber Ialong kala jam sha kaba kut ha kaba baroh ar kynhun kila ïakhaid da mar 1-1 kol.
Ha kane ka jingïalehkai ka Luti tuber Ialong ka la ïoh ban lamkhmat ïa ka jingïalehkai lyngba ka kol na ba la thep da u Ebormi Lhuid haka minit ba 37 hynrei ka Nangbah Mooknor kam shym la kynrandien na kane ka jingïalehkai bad ïakhun tyyngeh bad tang katto katne minit ba la ïaid ka kylla miet, u Ram Hinge u la ïoh ban pynïakhaid lyngba ka kol ha ka minit ba 57 bad kane ka la pynlong ïa kine ki ar kynhun ban ïakhaid ha kane ka jingïalehkai.
Haba phai pat sha ka jingïakhun kaba ar ka Mulang Ialong ka khur ïa ka namjop hadien ba ka la pynliem da 2-0 kol ïa ka Nangbah Khloopano, bad baroh ar kol na ka bynta ka Mulang Ialong la thep da u Tellme Mulieh haka minit ba 36 bad ka minit ba 58.
Katba ha ka jingïakhun kaba lai ka Madankynsaw Mookyndeng ka la lah ban pynjemkhnap ïa ka Kseh sylle Ialong da kaba pynbam haduh 4-1 kol. Ka Madankynsaw Mookyndeng ka la ïoh ban pynkhihjar nyngkong lyngba u L. Passah haka minit ba 24, nangta bud sa ka kol na u D.C Sayoo haka minit ba 27, ka kol kaba lai la thep da u P. Lamare haka minit ba 59 katba kaba saw da u C. Suchiang haka minit ba 65. Na ka liang ka Kesh Sylle Ialong ïa ka shikol la thep da u Iah Dhar haka minit ba 20.
Katba ha ka jingïakhun kaba saw ka Tympang Club ka la khur ïa ka namjop hadien ba ka la pynliem da 2-0 kol ïa ka FAM bad ïa kitei ki ar kol na ka Tympang Club la thep da u Niwanoo Lamare haka minit ba 49 katba ïa ka kol kaba ar da u Dayoki Dkhar haka minit ba 70+3 kaba la ïarap ban khur namjop.