Ka BJP kan sa shah weng noh na ka bor ha u 2024, kob u President Congress

Shillong, Naitung 12 : U MP ka Shillong ba dei ruh u President ka Meghalaya Pradesh Congress Committee (MPCC), Bah Vincent H Pala ha ka sngi Balang u la ong ba ka BJP kan sa shah weng noh na ka bor ha ka elekshon ban wan ha u 2024.
“Baroh mynta la ka long ha Delhi ne ha kino kino ki bynta jong ka India ki la ïohi lypa ba ha ka elekshon ban wan kan dei ka sorkar bym dei BJP ban ïalam ïa ka sorkar pdeng,” ong u Bah Pala haba kren bad ki lad pathai khubor hadien ka jingïalang jong ka MPCC.
Da kaba kam ba ki don bun ki jingeh hapoh ka BJP, utei u MP u la ong, “Ka jingïakhun para ma ki hapoh ka sem BJP ka long kaba jur bha,” u la ong shuh shuh. Nalorkat, u la kynnoh ruh ba ka BJP ka la duh bor ha ki sor kiba heh ba heh kum ha Delhi, Karnataka, Chennai bad kiwei kiwei.
“Kiba bun ki jaka ha ki sor bah, ki la duh bor bad wat ha ka Ri ruh kin sa duh ïa ka bor mynta ka kynti,” u la ong.
Shwa kane, u nongïalam ka CLP, Bah Ronnie V Lyngdoh u la pyntip ba ka party ka la pynkhreh shaid shaid na bynta ka elekshon Lok Sabha kaban sa long shen bad ruh kumjuh ïa ka elekshon MDC ha KHADC bad JHADC da kaba pynkhlaiñ ïa ki kynhun treikam ha man la ki jaka.
Da kaba pynpaw ïa ka jingkyrmen ba kin ïoh biang ïa ka jingjop na Shillong seat, u Bah Ronnie u la ong, “Ngi don ka jingkyrmen ba ngin jop biang na Shillong. Ngi don u MP jongngi bad ngi don ka jingkyrmen 100 persen ba ngin ïoh biang ïa ka jingjop,” u la ong.
U Bah Ronnie u la ong ruh ba lada peit na ki ar tylli ki elekshon ha ki ar tylli ki jylla, kata ka Himachal Pradesh bad ka Karnataka kaba u Myntri Rangbahduh bad u Myntri Kampohiing ka Ri ki pynlut da ki taiew bad bnai ban ïalap elekshon, hynrei ki la shah rem. “Kumta, ngi don ka jingkyrmen ba ha baroh kawei ka ri ka jubab kan dei kajuh.”
Utei u MLA u la ong ruh ba kin pyrshang wat ban jop na Tura seat ha kane ka elekshon ban sa long. U la pyntip ruh ba shen kin sa wad kyrtong da kaba jied na kito ki kyrtong kiba don ka jingkyrmen ban jop. Haba ïadei pat bad ka elekshon MDC u la ong ba ki don ka jingkyrmen ba kin jop bun bha khamtam ha rilum Khasi bad Jaintia.