Jowai, Naitung, 12: U MLA ka Jowai u ma Wailadmiki Shylla mynta ka sngi ula plie paidbah ïa ka dukan die ïa ki symbai mar rep ne ka ‘Collective Marketing Center’ jong ka Integrated Village Co-operation Society (IVCS) Ltd. Mukhla Nongrim kaba don ha Ladmukhla hajan ka pung Thadlaskeiñ West Jaiñtia Hills District.
Ha kane ka jaka die symbai lah ban ïoh naduh ki jingbam jong ki jingri kum ki syiar, masi, sniang nalor ki sboh kba, Synbai jhur, ki dawai khniang bad kiwei kiew de ki mar rep.
Ïa ka jingïalang ha kane ka sngi la pynïaid da u Chairman ka IVCS ma Muhon Sari, la ïoh ruh ka jingkren na ka Secretary ka IVCS kong Nital Suna, ha ka jingdonlang u symbud kongsan bah A.S. Suting Deputy Project Director, u District Project Manager bah Sywell Lyngdoh, u Waheh Shnong ka Mukhla Nongrim ma Buhlut Suna, u Chairman Marketing Center ma Janra Sari, Waheh Shnong Ladmukhla ma Bormi Lyngdoh, u Secretary Mukhla Nongrim ma Stanbyme Sari ki Dkhot member jong ka IVCS nalor kiwei de.
Ka kong Nital Suna, Secretary IVCS kala ïathuh shaphang ka jingïaid lynti jong ka IVCS ïa kaba la seng naduh ka 19 tarik Nohprah 2019, da kaba sdang shwa ïa ka jingïathied share kaba long T.500 tyngka hashwa ban rung kum ki member, ka bai Registration fee kaba T.10 tyngka bad ka Admission Fee T.50 tyngka kiba hap ban buh ïa kine ki kyndon ka IVCS haduh mynta ki Member kila don 271 ngut, ki share ki don 327 tylli kaba long 1,63,500 tyngka.
Ka la pynsngew ba ki nongkynshew pisa ki don 304 ngut bad ka pisa kaba la ïoh lum mynta kaba poi sha ka T.31,37,135/- tyngka, ha kaba la don ruh ïa ki Pressure Group (PG) 17 tylli bad ka jingïarap pisa (lone) kaba la dep ai sha ki dkhot ki don 62 ngut bad ka pisa kaba wan kala poi sha ka T.16,21,000.
Ha kaba ïadei bad ka pisa kaba thep manla u bnai ka don T.3,47,000/-, ka pisa ba bun da ki snem ka don 2,24,000/- kaba la ïoh kynshew na ki paidbah bad ki member ka IVCS.
Kiwei ki lad jingïarap kiba kane ka ophis IVCS kala ïoh kawei 1,50,000 kynthup ïa ka Computer, ki miej bad ka Droll, ka Corpus Fund kaba shong dor 2,50,000/-, ka kynja Honorarium kaba long 30,000/- nalor kiwei kiwei de ki lad jingïarap.
Lyngba kane ka IVCS la lah ban plie ïa dukan sha ha Mukhla Nongrim ha ka jinglut kaba 50,000 tyngka lyngba ka jinglah ban die sha la lah ban pynphai ïa ka pisa 14,000/- tyngka.
Kane ka IVCS Ltd. Mukhla Nongrim ka don ïa ki Committee bapher bapher kum ka Managing Committee kaba hakhlieh duh, ka Finance Committee, Business Committee, bad ka Procurement Committee ha kaba ïadei bad ka jingtied jingtda.
Katba na ka liang u kongsan ma Wailadmiki Shylla ha ka jingkren ula kyntu ïa kane ka kynhun IVCS ba kan dang trei shitom na ka bynta ka kam ba bha da kaba pynkiew shuh shuh ïa ka lad jingïarap pisa lone ïa kiwei bad ban pyntreikam hok ïa ki skim ba la ïoh.
Ula kyntu ïa ki khun samla ban trei shitom ha ki kam lajong, namar kumba long mynta hapoh ka District ki don kyrhai ki kam naduh ka kam ri jingri, ki kam khap shñiuh, ki dukan Hardware bad kiwei de kiba bun sien la ju trei da ki bar jylla.
Wat na ka liang ka sorkar kala ai jingrap lyngba ki skim bapher bapher naduh ki kam ri jingri, bad ula kyntu ba dei ban ïakhun katba lah ba ka dor kam dei ban kiew haba pyniaid ïew ïa ki mar rep sha kino kino ki jaka, ong ma Wailad.
