Leh burom ka skul A.G SS ïa ki samla pule ba pas bha

Nongstoiñ, Naitung 12: Ka Assembly of God Secondary School, Siejlieh mynta ka sngi Hatmajai jong ka taïew ka la ïoh ban pynkup burom ïa ki samla pule kiba la pass bad wan shakhmat ha kane ka exam SSLC jong u snem 2023.
Ki samla pule jong katei ka skul kiba la ïoh ban kheit ïa u soh ka jingjop ha kane ka exam SSLC ki la don kumba 7 ngut baroh kynthup ïa kiba la pass ha ka kyrdan 1st division bad kiba ha kiwei pat ki kyrdan.
Ha kane ka sngi u bah Gabriel Wahlang MLA/MDC ka Nongstoiñ konstitwensi u la long kum u kongsan, ban pynkup burom ïa kitei ki samla ha ka jingïadonlang ryngkat u Headmaster katei ka school u Rev. Dr. M.S Nongrem, u bah G.W.Nonglang dikon ka Assembly of God Church Siejlieh, ki nonghikai, ki khynnah skul lem bad ki kmie ki kpa kiba la wan ban sakhi lang ïa katei ka jingïalang pynkup burom.
U kongsan haba ai jingkren, u la ong kum u Nongmihkhmat u kwah ban ai mynsiem ban ïadon bynta lang ym tang ha ki skul kiba heh kiba don da ki hajar ngut ki khynnah skul. Hynrei ïa ki skul kiba rit ruh kiba ïoh lehse ki don ka mynsiem ka jingduh jingkyrmen ban ong, hawto don ne em kiba ithuh kum ïa ki namar haba trei ki kam paidbah ym ju dei ban ñiew shilliang.
Haba bynrap ïa ki jingkren, u kyntu ruh ïa ki khynnah skul da kaba u la ong ki khynnah kiba la ïoh ban kheit ïa u soh, kim dei ban shu kut tang katne. Hynrei, kane ka dang dei tang ka jingsdang bad ka burom nyngkong kan long ïa ki bud sa ki kmie ki kpa jong ki nangta kan wan sa sha ki nonghikai kiba la pyntbit ïa ki.