Imphal, Naitung 3: Ka jingïaumsnam ha Manipur ka la nang shyrkhei shuh shuh, haba hynnin ka sngi, uwei u rangbah, uba la tip kyrteng kum u David Thiek, u la shah khrai khlieh bad lai ngut kiwei pat ki para shnong jong u, ki la shah siat ïap hynnin ka sngi ha ka shnong Langza, kaba shong shnong da ki Hmar bad ki Kuki, kaba hap ha Churachanpur District.
Ki khubor na katei ka jylla kaba la don hapdeng ka jingïaumsnam mynta la ar bnai kynthih, ka ïathuh ba u Rangbah Shnong na ka jaitbynriew Hmar u la maham ïa ki paidbah nongshongshnong ban ïaphet noh na shnong namar ba kiwei pat ki kynhun jaidbynriew kiba la suba ba kidei ki Meitri, ki la wan hiar thma ïa ka Shnong jong ki. Kiba bun ki briew ki la ïaphet bad ieh ïa ki ïing ki sem. Hynrei ka Shnon ka la buh kumba 20 ne 25 ngut ki rangbah ban ap bad ïada ïa ki ïing ki sem. Uwei David Thiek udei uwei na kine kiba la ap bad ïada ïa la ka Shnong bad ki ïing ki sem.
Hynrei kine ki kynhun na kiwei pat ki jaidbynriew ki la siat da ki suloi bad tur naphang ïa kine kiba ap pahara, ha kaba lai ngut ki la shah siat ïap bad u David u la shah mait da ka wait na ryndang haduh ban da dkut thui ka khlieh. Ki khubor ki ong ba kine ki runar ki la sieh ïa ka khlieh jong u ha ki dieng kiba don harud surok.
Kiwei pat ki tyllong khubor ki ong ba kine ki lai ngut kidei kiba shah siat ha kawei pat ka District, haba ki kynhun kiba kieng atiar ki la thang ïa ki ïing ki sem bad kine kiba shah siat kidei kiba ïada ïa la ki jong ki ïing ki sem jong ki.
