Sahkut ki Kali bad ki paidbah da ki spah tylli ba kylla ka Trok ba kit ïa ka kor puhshilum ha Umtung

Nongpoh, Naitung 01: Da ki spah ngut ki paidbah bad kynthup ki Kali paidbah mynta ka sngi ki la sahkut ha ak surok na Bhoirymbong sha Kyrdem, kaba dei hadien ba kawei ka Trok kaba kit ïa ka kor Puhshilum (Excavator) ka la kylla bad ka la khanglad ïa ka ïaid ka ieng ki paidbah na katei ka thaiñ Kyrdem ha Ri Bhoi.
Kane ka jingjia ka la jia mynta ka sngi ha ka por 12 baje mynsngi, ha kaba kawei ka trok kaba wan na ka thaiñ Kyrdem bad kaba kit ïa ka kali Puhshilum ka la kylla hajan kawei ka jingkieng ba la tip kum ka jingkieng Umket kaba don hajan ka wah Umtung bad da kane ka jingkylla kane ka trok ka la wan rah ïa ka jingpynthud ïa ki paidbah ha ka leit ka wan ba kim lah shuh ban ïaid na katei ka surok ba la khanglad na ka jingkylla katei ka Trok.
Kumba la ioh lum jingtip, halor kane ka jingjia ym shym la don mano mano ba mynsaw bad lait noh ka jingshah ktah ki paidbah haka leit ka wan bad khamtam mynta ka sngi kaba dei ka sngi ïew Umroi ba bun ki paidbah ki leit sha katei ka ïew ban siew ban tad ba ka dei ka ïew kaba shisien shi taiew ban bsa bam ïaki paidbah ha ka thaiñ Umroi.
La ioh lum jingtip ruh na ka jingkhang lynti kane ka trok ba kylla ha surok, kiba bun ki nongleit nongwan ki la sahkut noh ha katei ka surok bad ban pynpoi ïa ki paidbah ba leit ba wan bad khamtam kiba leit iew ki Kali b akamai paidbah ki hap ban ïa kylliang ïa ki nongleit nongwan ba ki Kali kim lah shuh ban ïaid lyngba katei ka surok ba la khang sbak da katei ka trok kaba la kylla ha katei ka surok.
Halor kane ka jingjia, la ioh lum jingtip ruh ba ki bor Pulit na Khapmara PIC tang mar ïa ioh jingtip ki la phah noh mardor ïa ki bor pulit ban tohkit halor katei ka jingjia bad khamtam ban thaw ki lad ki lynti ban sei noh ïa katei ka Trok ba kylla khnang ba kan nym wan rah shuh ka jingpynthud na ka bynta ki spah ngut ki paidbah kiba leit ba wan lyngba katei ka surok paidbah.