Hadien ba ngi la bishar bniah ïa ka rukom treikam ngi sa shim rai ban weng: Paul

Shillong, Jylliew 30: U Myntri ka Tnat Social Welfare u Bah Paul Lyngdoh u la ong ba ka jingweng ka tnat ia Kong Phidalia Toi, kum ka Chairperson ka Meghalaya State Commission for Women (MSCW) ka dei hadien ba la bishar sania ia jingtreikam jong ka ha kine ki snem kiba la leit bad la lap ba kam pyndep hok ia ka deiti ba la bynshet ha ka.
Haba kren sha ki lad pathai khubor u Bah Paul u la ïathuh ba ha ki 12 sien shong jingïalang ka Commission na ka liang ka Chairperson kam ju wan jinglang satia da kaba ai daw ba kam don hapdeng ka met bakoit ba khiah.
“Kum ka khlieh duh ka Commission ka Kong Phidalia Toi kam ju wan shim bynta ha ki 12 tylli ki meeting ba la lum da ka commission bad nalor ka jingpynkheiñ ïa ki kyndon kiba la khang pyrshah ïa ki Chairperson ka Commsion ban shim bynta ha kino kino ki jingïalang saiñ pyrthei,” u la ong.
“Kam don kano kano ka jingshun shimet ïa i hynrei dei hadien ba la bishar ïa ki file ba poi ha ka miej jong nga kum u myntri ba ngi shim ïa ka rai,” u la bynrap.
U Bah Paul u la ïathuh ruh ba na ka liang ka tnat ka la rai ban thung ïa ka search committee ban wad Chairperson thymmai jong ka MSCW.
“Ngi la rai ban thung ïa ka Committee ban wad ïa ka Chairperson thymmai ha kaba ki dkhot kin dei ki ophisar ka sorkar bad ruh ki Principal ki kolej kum na Womens’ College bad Lady Keane College,” u la ong.
U la ong ruh ba lada i donkam ban thung ïa ka Chairperson shipor katba ym pat ïoh da kaba pura na ka liang ka tnat kan khmih bniah ïa kane.
Haba ïadei bad ka jingsiew, u Bah Paul u la ong ba lada i donkam ban peit ban kyntiew ïa ka jingsiew sha ka Chairperson na ka liang ka tnat kan sa eksamin ïa kane.
“Ngi kwah ba kin ai ïa kaba bhatam bad lada i donkam ban kyntiew ïa ka jingsiew sha ki ruh ngin leh na ka liang ka tnat ïa kane,” u la ong.