Sha ki ar tylli ki longïing noh jingïarap ka “Ïarap ïa ki – ha ka khyllipmat ba ki donkam eh”
![](https://mawphor.com/wp-content/uploads/2023/06/iarrap1-Copy.jpg)
Shillong, Jylliew, 29: Ka kynhun ki ‘riew paidbah hapoh ka lama, “Ïarap ïa ki – ha ka khyllipmat ba ki donkam eh”, kaba dei ka WhatsApp Group bad lyngba ka social media ka la lah ban pynmih ïa u synñiang ban ïarap ïa artylli ki longïing kiba don hapdeng ki jingeh. Kawei ka dei ka longïing i kong Rimabila Nongbet Sohlang na ka shnong Mawrohroh, Nongspung Syiemship shajrong ka shnong Tyrsad bad kawei ka dei ka jong i kong Linda Swer bad u bah Sdan Jaba na ka shnong Phanniewlah Rum, Lyngiong Lyngdohship.
Ha ka jingleit ha Mawrohroh la don ryngkat u bah Dmar Rani uba long u Sordar jong ka shnong, kiba ha ïing ha sem bad katto katne ki nongshong shnong. U Sordar ka Shnong u la ai khublei ïa kane ka kynhun kaba la mih shakhmat ban ïarap ïa kane ka longïing ha ka por ba ki don hapdeng ki jingeh. U kpa jong kane ka longïing u la khlad noh dang shen da kaba iehnoh ïa ka kurim bad ïa hynriew ngut ki khun, kynthup ïa iba dang san bnai bad kane ka longïing ka ïa kynduh ïa ki jingeh ha bun ki liang bad ka ïing kaba ki shong ki sah ruh ka dei kaba khapngiah. La aiti ïa u synñiang ha i kong Rimabila da i kong Revereen Dkhar i longkmie na Mawngap Lumparing iba ïadon bynta ha kane ka kam ban ïa noh synñiang.
Ha ka jingleit ha Phanñiewlah Rum la don ryngkat u bah Justin Kharbteng uba long u Rangbah Shnong, ki ‘riew rangbah, ki longkmie, ki samla kynthei bad shynrang, kumjuh kiba ha ïing ha sem. Na ka liang u Rangbah Shnong u la pynpaw ba ka long ka nuksa ba janai ïa kiwei ruh kiba don ka mynsiem sngewlem ban kner ki kti ka jingïarap haba ki paradoh parasnam ki donkam ka jingïarap.
U ïathuh ruh na na ka liang ki nongshong shnong ruh ki la lum ïa u synñiang katba mih ban ïarap ïa kane ka longïing kaba mad ïa ka jingeh na ka jingshitom jong ar ngut ki khun ba dang ar snem, ar bnai bad ka kmie ruh kam don ka met ba koit ba khiah naduh ba ïoh ïa i khun ba rit, kumjuh u kpa u don ha ka met bym da shait da khlaiñ. U samla Saiñkupar Sunn na ka shnong Mawkalum kum uwei na ki dkhot kane ka kynhun u la aiti ïa u synñiang ha i kong Linda.
Na ka liang jong kane ka kynhun ka la leit jngoh ïa kine ki longïing bad pyrshang ban pynsngew halor kane ka bynta lyngba ka YouTube, WhatsApp bad Facebook ban pynmih ïa u synñiang. Hadien ba la ïoh ban lum katto katne u synñiang tang ha i por ba lyngkot ki la leit ban aiti da ka jingkyrmen ba kan long ka jingïarap ïa kine ki longïing wat la i jingïarap i long iba rit.
Ïa kane ka kynhun la ïalam da u bah Staising Kharbteng uba long u nongsaiñdur ïa kane ka kynhun ha ka jingdon ryngkat ki katto katne kiba la noh ïa u synñiang bad haba kren ha baroh ar tylli ki jaka u la pynpaw ka jing-sngewnguh ïa baroh kiba la ïadon bynta ban pynmih ïa u synñiang na kylleng sawdong ka Bri u Hynñiew-trep kynthup ïa ka KSUTyrsad Circle kaba la ïadon bynta ban noh va u synñiang na bynta kine ki kam leh isynei ha kane ka sngi, da kaba kyntu ïa kiwei ruh ban mih shakhmat ha kane ka bynta khlem da ap ne khmih lynti ïa kiwei ba kin leh ei ei.