Ka mat ïakren halor u pud u sam kadei kawei na ki mat jong kine ki sng ne ka ‘topic of the day’. Haba kyrtiang dien tiak sha ki sngi shuwa jong ka jingïasoi ïa kata ka MOU hapdeng jong ki arngut ki Myntri Rangbah ka Jylla Meghalaya bad Jylla Assam, shisha ki paidbah ki dap da ki jingsngew khie im pat ban ïoh sngew ïa ka jingshim khia jong kane ka sorkar MDA ban shim ïa ki lad ki lynti ban pynbeit noh ïa u pud u sam hapdeng ki ar jylla. Ka long kaba dei hok ïa ki paidbah nong shnong shnong khamtam jong ka Jylla Meghalaya ban khmih lynti ia kiei kiei kiba bha kumba ka Jylla ka la kynjoh artad sha ka jingdap 50 snem ne ka Jubili Ksiar jong ka jingïoh ïa ka jylla ba pura. Hynrei hadien ba la dep ban pynbna ba la ïasoi ïa ka MOU kiei kiei ki kylla dang kumwei pat bad ki la mih shibun ki jingbymhun. Hato kane ka pyni ba wat hadien 50 snem ka sorkar ka dang sah khynnah bad phiel ban pyndep ïa ki kam ha ka rukom kaba beit bad ïa hun lang da baroh?
Ka kam khyndew kam shyiap ka dei ka kam kaba khia bad kaba jwat bha ïa baroh bad ka jingbakla halor kane ka wanrah ïa ka jingïa sngewsih wat shi ïing shi sem, para marja marpa bad katno tam leh da ki shnong bad da ki hima. Ha ka jingshisha kat kum ba la ïohi ka sorkar ka la pyrshang ban leh ïa kaba bha eh ban don ïa kita ki Border Committee na ka bynta ban ïasyllok bad ki Hima bad ki shnong ka thaiñ khappud. Hynrei kat kum ba lah ban ïohi ha ki khubor ki paidbah wat kat hapdeng jong katei ka jingshim khia jong ka sorkar ruh la kynnoh ba ki dang shah shet kylla hi ha ka sorkar. Ha kawei na ka jingkren la ïohi ba ka sorkar ka la shim da karai kaba da kumwei pat kata da kaba bud ïa ka jingsorjamin jong u snem 2011 bad lada ka long kumta ka mut katei ka jingsor jamin jong ka sor ka la dep long lypa kaba ka bym ïahap kat kum ka mon jong kito kiba shah ktah ha ka MOU. Hynrei ka shu lah ban long ba ha katei ka snem 2011 kam ktah ïa ki namar ba kam pat dei ka rai pynbeit pud ban ïoh ne duh nong.
Ha kaba ïadei bad katei ka kam pynbeit pud na ka bynta ki riew paidbah ki bymdon jingtip ei ei halor ka jinglong jingman uta u pud u sam ki dap da ka jinglyngngoh ban ïohi bad ki paidbah ka thaiñ khappud ki kynnoh bad ka sorkar ka la shet kylla, ba la lilam ïa ka khyndew ka shyiap sha ka jylla assam bad kumta ter ter. Katba na ka liang jong ka sorkar MDA, ka kam ba ka la leh ïa kaba bha tam kaba baroh ki sorkar kiba la bat ïa ka bor synshar ha ka jylla ha kine ki 50 snem kim shym la lah ban leh ei ei. Bad la ïohi ba khatduh ka sorkar katkum ka jingkren jong u Myntri Rangbah bad ruh u Symbud Myntri Rangbah ki la ong ba kin ym lah da lei lei ban phai dien biang halor ka MOU, hynrei ki paidbah ki hima ka thaiñ khappud bad ruh katto katne ki MDC ka KHADC ki la ong ba kin ïaid beit shakmat ban wad ïa ka jingbishar hok na ka ïingbishar Supreme Court badon burom ka ri India.
Kum ki riew paidbah, ka long kaba sngew lyngngoh shibun eh ba kumno ki paidbah kim hun, hynrei ym sngewlah ban ong ba ki paidbah kin bakla bad ka long kaba jnang katta katta lada ka sorkar ka shet kylla shisha. Baroh ki nongshnong shnong ka jylla Meghalaya ki dang ap kyrmen ïa kane ka sorkar MDA, hynrei kaei kaba la mih na ka jingiapynbeit pud ka wanrah u dak jingkylli uba heh bha ?
Ka long ka jingai jingmut ïa ka sorkar, namar ka dei hi ka sorkar kaba lah ban leh ïa kiei kiei kiba bha, ym dei ki paidbah namar ba ka sorkar hi ka dei ka bor jong ki paidbah. Kumta ïa kino kino ki rai bad jingïabeit dei ban shim da ka rai paidbah ne ka HEARING ban biang lut da baroh ki sakhi satar, shuwa ban jam sha ka MOU kaba arwat khamtam lei ka Langpih bad ruh ka Block I & II, nalor kiwei pat ki thaiñ khappud. Ka jingpynbeit pud na baroh ar ki liang kan long nyngkong shuwa hakhmat ki paidbah bad hadien kata lah ban ïasoi ha ka rukom jong ka aiñ khnang ba kan ym mih shuh kano kano ka kynrum kynram hadien habud. Ki paidbah ki lah ban bakla ruh hynrei ka sorkar kam dei ban bakla pynban ka dei ban pynbeit ïa ki jingbakla jong ki paidbah ym dang kaba ïaid lait na ki hynrei ba kin ïoh hun lang bad lait na kino kino ki jingiakhih kumba ka long mynta.
