Shillong, Jylliew 24: Kan long ka sien kaba nyngkong eh ba ki khynnah skul kin ïoh ïa ka lad ban rung hapoh ka Iing Dorbar jong ka Khasi Hills Autonomous District Council (KHADC) ban peit ïa ki jingïakren bad ki jingïatai jong ki MDC ha ka Dorbar Mang Tyngka kaba la sdang mynta ka sngi Saitjaiñ.
Kine ki khynnah skul ba la synran lang da ki nonghikai ki dei kiba pule ha St. Paul’s Higher Secondar School, Marbisu, ka Little Star English School, Ribhoi District bad ka Mary Mount Higher Secondary School, Mawlai Mawtawar.
Kane ka jingïohlad jong ki khynnah skul ban leit sakhi da la ki jong ki khmat ïa ki jingïatai bad ki jingïakren hapoh ka dorbar ka dei lyngba ka jingshimkhia jong u Chairman ka Council u Bah Lamphrang Blah.
Hadien ba la kut ka dorbar, kine ki khynnah skul ki la ïohlad ban ïashondur lang bad u Chairman ka KHADC u Bah Lamphrang Blah, kynthup ruh u Chief Executive Member (CEM) u Bah Pynïaid Sing Syiem, ki Executive Member bad ki MDC jong ka Council.
Ynda ladep ka jingshondur, u Chairman ka Council u la batai khyndiat khynsoit sha ki khynnah skul ïa ka rukom treikam jong ka Council.
