Da ka Bike rally pynlong ka tnad Pulit Ri Bhoi ban ïalap pyrshah drok, ai mynsiem u DC

Nongpoh, Jylliew 24 : Kum ka thong ban pynduhjaid noh ïa ka jingktah jong u drok sha bun ki khun samla hapoh ka District bad ka jylla hi baroh kawei, ka tnad Pulit ka Ri Bhoi la bteng ban hiar thma pyrshah ïa u drok da kaba pynlong ïa ka Bike Rally kaba long shi bynta ban ai jinghikai sha ki paidbah halor ka jingma bad ka jingktah jong u drok ïa ki khun samla jong ka District bad ka jylla hi baroh kawei.
Kane ka jinghiar thma ki bor pulit ka Ri Bhoi pyrshah ïa u drok, ka la paw pyrthe ruh mynta ka sngi, hadien ba na ka liang ka ophis u SP ka Ri Bhoi ryngkat ka jingïatrei lang bad ki bor shnong bad ki khun samla ki la pynlong da ka Bike Rally ban ai jinghikai ne kyrsiew thiah ïa ki paidbah ba kin tip halor ka jingma kaba ktah na ka jingkyrni ha u drok.
Ïa kane ka Bike Rally la sdang na Nongpoh ba la kaweh lama da u Deputy Commissioner ka Ri Bhoi, u Arpit Upadhyayay bad la pynkut pat shaduh ha Lad Umsaw ha Umiam ban ai ka jinghikai bad pynshai sha ki paidbah da ki pulit ophisar halor ka jingktah jong u drok ïa ki khun samla ka juk mynta.
Na ka liang u Deputy Commissioner ka Ri Bhoi, u Arpit Upadhayay, haba kren hadien ka jingplie ïa kane ka Bike Rally ba la shim bynta da bun ki khun samla ka Ri Bhoi ryngkat ki pulit, u la ai ka jingïaroh ïa ka tnad pulit ka Ri Bhoi kiba la pynlong ïa kane ka prokram kyrpang ban ïaleh pyrshah na ka jingkynrei u drok bad kum kine ki jaid prokram dei ban pynlong man ka por khnang ban ioh lad ban ai jinghikai sha ki paidbah nongshong shnong ka District ban tip halor ka jingma bad ka jingktah jong u drok ïa ki khun samla ka juk mynta.
Kum u ophisar ba hakhliehduh ka District, u Arpit Upadhyaya u la ai mynsiem ruh ïa ka tnad Pulit ka Ri Bhoi bad kumjuh naduh ki bor shnong ba ki dei ban don ka jingïatrei lang na ka bynta ban ïaleh thma pyrshah ïa u drok, namar ban pynduh jaid ïa ka jingkynrei u drok donkam ban don ka jingïatrei lang na baroh ki liang ha ka imlang ka sahlang, u la ong.
Shuh shuh, u la bynrap ruh da kaba ong ba la dei ka por ban don ka jingïatrei lang na baroh ki liang ha kaba ïaleh thma pyrshah ïa u drok bad da kaba pynlong ïa kum kine ki jaid prokram ban ïalap pyrshah ïa u drok bun ki paidbah nongshong shnong kin tip ïa kata ka jingktah u drok bad khamtam kan long ruh kawei ka khubor kaba mahap ïa ki khun samla ba kim dei ban ktah ïa u drok ha kaba bun ki samla kiba la ngop ha u drok ki la jot ka jingim bad ki la pynjot lang ruh wat ïa ka ïing ka sem bad ka imlang ka sahlang, u la bynrap.
Na ka liang ki ophisar ka tnad Pulit, ki la pynlong ruh ka jingai jinghikai ban pynshai sha ki paidbah ha ki lai jaka kata ha Nongpoh, Umsning bad ha Lad Umsaw ba ki ophisar ki la kren sha ki paidbah bad ai ruh ka jinghikai halor ka jingma jong u drok ba kum ka tnad Pulit ka pan ka jingkyrshan bad ka jingïatrei lang na ki paidbah ha kaba ïakhun pyrshah na ka jingkynrei jong u drok.