Shillong, Jylliew 20 : U Symbud Myntri Rangbah ka jylla uba dei khmih ïa ka tnad PWD u bah Prestone Tynsong u la ong mynta ka sngi Ba ar ba u la dep bthah ïa ki engineer ka tnad jongu ba kin phah pynbha ïaki surok kiba shah ktah na ka jingjur u lapbah.
“ Nga la bthah ïa ki bor pynïaid ka tnad , ïa u Commissioner bad Secretary, Secretary bad baroh ki engineer ba kin long kiba la pynkhreh lypa khnang ba lada don kano kano ka jingdonkam ban shna pynbha kyrkieh ïa ki surok ba shah ktah na ka jingjur slap kin ïoh ban leh kloi kloi” ong u bah Prestone.
Ha kaba ïadei bad ka jingtwa ba dang shen ha riat Rngain kaba hap hapoh ka Pynursla Civil Sub Division, u Symbud Myntri Rangbah u la ong “ Nga la dep bthah ïa ki briew ka NHIDCL ba kin long peitngor baroh 24 x 7 bad ban pynkhreh ruh ïaki mashin ki kor ki bor khnang ba lada jia biang ka jingtwa kin ïoh ban pynkynriah ïa ka jingtwa mar mar ba kan ym thut slem ka leit ka wan”.
Halor ka FIR ba la ujor mynshwa namar ka jingduh noh arngut ki mynsiem briew na ka jingtwa ha kane ka juh ka jaka u la ong ka jingtohkit ki pulit ka dang ïaid shakhmat bad tang shu dep kin sa aiti ïa ka kaiphod sha ka sorkar ba kan bishar bniah bad leh ïa kaba donkam.
Halor ka jingkylli kumno ka tnad kan leh na ka bynta ban ïada ïa ka jingtwa ka khyndew ha ka surok bah ( tunnel) kaba ha Sonapur, NH-6 u la ong na ka bynta ki surok bah ( national high way) kim hap hapoh ka jingpeit jong nga hynrei hapoh ka jingpeit jongka sorkar pdeng.
“ ïa ka surok naduh Shillong haduh Dawki la dep aiti sha ka NHIDCL bad ïa ka surok naduh Shillong-Guwahati-Jorabat haduh Sonapur la dep aiti sha ka NHAI. Kumta kine ki dei kiba peit ïa kine ki surok tangba namar ba ka surok ka hap hapoh ka jylla Meghalaya nga la ïakren bad ki bad kyntu ïaki ba kin pyrshang ban thaw lad kloi khnang ban ym thut slem ka leit ka wan. La pyrshang ruh ban pynkhreh ïa ki lad ki ban pynkut syndon ïa ka jingtwa ha katei ka jaka bad na ka liang ka IIT Delhi ka la wan ban leh ïa ka sorjamin bad ka dang bishar bniah kumno ban leh ban khang lad ïa ka jingtwa ha katei ka jaka kaba ju jia man la u snem tang shu la jur u lapbah” ong u Symbud Myntri Rangbah.
