Ka dei ka dak ka shin kiba bha ong ka Kong Ampareen hadien ba kyrshan ka Congress ïa ka NPP

Shillong, Jylliew 20: Ka Nongaiktien jong ka National People’s Party (NPP) kaba dei ruh ka myntri ha ka sorkar MDA II ka la kam ba ka jingkyrshan ka Congress ïa ka NPP ban thaw ïa ka EC kaba thymmai ha KHADC da ka jingpynkhyllem noh ïa ka EC ba la ïalam da ka UDP ba ki dei ki jingjia kiba sngew tynnad.
“Nga kem ba ki paralok na ka Congress ki poi ban ïatreilang bad ngi ka NPP namar nga ruh kum ka dkhot barim ka Congress ngi don bun ki paralok ha katei ka party barim jong ngi bad ki paralok Congress ruh ki don bun ki paralok ha ka NPP,” ka la ong.
“Mynta ba nga la don ha ka NPP ka jingtreikam ka long kaba sngewtynnad haduh katta katta bad na ka liang jong ngi kum ka party ruh ngi pdiang sngewbha ïa kito kiba kwah ban ïatreilang bad ngi na bynta ka roi ka par ka jylla bad ha kaba ïadei bad ka jingwan kyrshan ka Congress ïa ka NPP ha KHADC kyrmen kan sei ïa u soh uba thiang ha ka saiñ pyrthei”, ka la bynrap.
Haba iadei bad kane ka jingkyrshan ka Congress ïa ka NPP ban pynkhyllem ïa ka EC ka UDP ban pynshong syndon ha ka ben ka liang pyrshah, ka Kong Ampareen ka ong ba ka jingïatreilang hapdeng ka Congress bad NPP ka dei kaba ka la ïohi lupa naduh ki snem kiba kham mynshuwa.
Ka la ong ruh ba ka jingpynshong noh ka NPP sha ka ben liang pyrshah ka dei kaba na ka liang jong ka kam lah ban jubab hynrei dei ki MDC kiba lah ban ai ka jubab kaba biang tam.
Haba la kylli la ka NPP ka long ba la kloi ne em ban ïatreilang bad ka Congress ha ka sorkar, “Naduh ki snem ba kham mynshuwa ka NPP ka la pyni ïa ki dak ki shin ba ka kloi ban ïatreilang bad ka Congress”, jubab ka Kong Ampareen.
“Ha ka por kaba ka NPP ka la wer ïa ngi ki 5 ngut ki MLA ka Congress ha kato ka por ban ïatreilang ha ka MDA I ka la dei ka dak ba ka kwah ba ka Congress kan don lang ha ka kynhun ka MDA, ha ka jingshisha ka MPCC ka la dei ban mynjur lang bad ka jingsdang jong ngi ki 5 ngut ha kato ka por ngam artatien kan dei hi na ka bynta ka jingmyntoi u paidbah nongshong shnong ka jylla”, ka la bynrap.
Shuh shuh ka la ong ruh ba ka khot ka wer ïa baroh ki seng saiñ pyrthei ba kin wan snohkti lang kum kawei ka kynhun haba mih kino kino ki jingeh kiba dawa ba ngin ïakhun da kawei ka buit bad kawei ka bor.
Haba iadei bad ka jingsngewthut ka UDP ïa ka jingleh ka NPP ka Kong Ampareen ka la ong ba na ka liang jong ka kan ym kwah ban kynthoh eiei ïa kane.