Mairang, Jylliew 20: Kum shibynta jong ka jingpyrman halor ki kam ïada mariang bad ka jingpyntreikam ïa kiba bun ki aiñ ïada mariang kiba kynthup ïa ka aiñ Environment Protection Act bad ka aiñ Biodiversity Act, ka ophis jong u Range Forest Officer, Mairang Range ha ryngkat ka jingsynranlang jong ki bor pulit ka Eastern West Khasi Hills District, ha ka 16 tarik u Jylliew 2023, ki la leit ban jurip ïa ki kam thang rnga beaiñ ha ki katto katne ki bynta jong ka distrik.
Ha kane ka jingleit jurip la lap ïa ka jingthang rnga beaiñ, ka jingkhaïi bad kit rnga beaiñ ha kiba bun ki jaka, khamtam ha ki thaiñ Sohjarang bad Pathar Lyndan na ka bynta ban pynpoi sha ki kharkana kiba don ha Ribhoi distrik.
Ha kane ka sngi la ïoh ruh ban pynpra noh ïa katto katne ki jaka thang bad ki jaka ha kaba la lum thup ïa u rnga beaiñ bad la ïoh ruh ban kurup ïa u rnga ba la thang beaiñ.
Wat hapdeng kiba bun ki dieng pyngkiang kiba ka ophis ka ïakynduh na ka por sha ka por, ka ophis jong u Range Forest Officer, Mairang Range lyngba ki snem, ka la ïai bteng ban pynlong ïa ka jingjurip bad jingkhynra ïa kiba kum kine ki jait kam beaiñ.
Kane ka ophis ka kyntu ruh ïa ki nongïalam shnong ka thaiñ ba kin ïatreilang ryngkat ryngkat bad ka tnat Forest, ban pakhang ïa kiba kum kine ki kam pynjot mariang. U Range Forest Officer ka Mairang Range u la ong ruh ba ka ophis kan ïai bteng ban pynlong ïa ki prokram pynshai paidbah halor kiba bun ki aiñ ïada mariang na ka bynta ki paidbah jong ka dong ka thaiñ.
