Katno ka long kaba sngew synei ban pyrkhat shaphang kito kiba la ngat ha ka apot jong ka jingkyrni ha ka jingdih drok, ym tang ba ka ktah ïa ki shimet hynrei ka ïing ka sem baroh kawei ka don ha ka jingim kaba dum. U drok u dei u jingdih ba pynbuaid udei uwei na ki atiar jingdum ba shyrkhei tam bad ki dei ki mar ba remdor bad lah ban ong dei tang kiba riew spah kiba lah ban ïalehkai bad ki. Ka long kaba shyrkhei ban ngop ha kine ki jingriam kiba ym ju lah koit ban iohi ïa ka jingsdang jong ki, hynrei dei tang haba kito kiba la kyrni kila poi ha u pud ba kim lah shuh ban rieh ba la lah ban ïohi paidbah ïa ki. Ki drok ki dei ki jingdih ne ki dawai kiba trei jai jai bad namar ba ki dei kiba remdor ki samla kiba duk kin ym lah satia ban pyndonkam ïa ki lait noh ba ki shu ïoh ei na ki paralok kiba kloi ban pynlut pisa lem na ka bynta jongki. Ka long kaba sngew suhjer ban tip bad ïohi ba kine ki atiar jingdum ki la ïoh wat ban rung sha ki dong ba shong ba sah tang para Khasi ruh
Ki don shibun ki daw ba ialam ia ki samla sha ka jingkyrni dih drok, kawei na daw kaba hakhmat eh ka dei ka jingsynjor jong ka longiing longsem. Ka jingpbymplie ka rukom pyrkhat ha ki kmie ki kpa ban pyrkhing ia la ki khun ha kaba pyndonkam ia ka pisa. Ka jingai pisa puk puk ia ki khun bad pynbiang katba ki ang ka pynjot ym tang ia ki khun jong ki shimet, hynrei ia ki khun jong kiwei ruh bad ruh ka wanrah ka jingjah burom bad ka jingjynjar ia ka iing hi baroh kawei. Ym lah ban len ia ka jingriewspah jong ka imlang sahlang mynta ha kine ki sngi bad dei na ka jingbun palat ka jingkamai ne ka jingioh pisa ba ki briew ha kine ki sngi kim don por shuh hynrei baroh ki bunkam beit ban kamai. Dei na kane ka daw ba baroh baroh ki ong ba ka por ka la lyngkot bad imat kam don shuh 24 kynta ha ka shi sngi. Toi ki kynta bad ki second km shym la pat kylla ki long beit kumjuh.
Uwei u Rangbah u la ong ba ka daw kaba kongsan bad kaba hakhmat eh jong ka jingioh lad jong ki samla ka dei na ka daw ka jingkyllei palat ka kamai shukor ne black money ba ki kmie ki kpa ki ai beit puk puk ia ki khun katba ki ang. Ka jingiohlut jong ki khun ia baroh ki jingkwah ha ka por ba ki dang rit dang lung ka rta ka pynlong ia ki ban hiar dor noh ha ka longbriew man briew bad kiew dor ki kam sngewbha. Ka jingsngewbha ne ka enjoyment kam lah satia ban pynhun ia ki briew la ha kano kan ka kyrdan, dei na kata ka daw ba ki iit ia kiwei pat ki jingsngewbha kiba kham khlain kham khlain bor bad u drok u dei u wei na ki atiar ba khlain bor tam bad shisien ba la ngat la long kumba thep ia along da lade ialade. Ha kaba kut lada kim ioh ia u drok ki samla kim salia ban leh ia kano kano ka kam ruh bad kin ialeh katlah katiai ban pynngop lem ia kiwei khnang ba kin long ki nongkyrshan jong ki.Ki nongdih drok kim lah ban shu long nongthied sah, hynrei kin iit ia ki lad ki lynti kumno ban ioh ban die de ia ki khnang ba kin lah ban kyrshan ia ka jinglut ba shyrkhei.
Ka long kaba donkam ia ki longiing longsem ban long kiba husiar bad kum ki kmie ki kpa donkam ban peitngor bha ia la ki khun ki kti. Uwei u rangbah u la ong ba ki kpa khamtam lei, kiba dei ki nongkamai ka iing kim dei ban pyni kop ne sop hakhmat ki khun ba haduh katno ki kamai namar ba kane ruh ka ialam bakla ia ki khun ki kti bad ka jingsngew riew spah jong ki ka wanrah ia ka jingsngew sarong. Katno ka long kaba sngewlyngngoh ba ki don ki longiing kiba ki kmie ki kpa ki la hap ban bsa ia ki jingdonkam drok jong ki khun jong ki tang na ka daw ba kim lah ban peit ia ki jingktah jong ka jingkyrni dih drok jong ki. Haduh kumba 2000/- tam shi sngi ki don ki kmie ki kpa kiba shlan ban iarap kyrshan pisa ban pynioh ia ki drok na ka bynta ki khun jong ki. Hynrei ha kaba kut kim shan bad ki hap ban leit ialam noh ia ki khun sha ki jaka aijingsumar.
Ki Dorbar Shnong ki donkam ban peitngor shisha bad shim khia halor kane ka phang kaba lah ban ktah jur ia ka imlang shlang. Ki bor pulit barabor ki long kiba iatreilang bad ki paidbah ha kiba bun ki khep ba kum kitei. Ka sorkar ka donkam ban shimkhia ban wanrah ia ki lad jingpynsngewthuh paidbah kiba kham khlain halor katei ka phang khnang ba ki longiing kin long kiba phikir bad kiba peitngor.
