Mawkyrwat, Jylliew, 15: Ka JNV, Mawkyrwat ha ka 14tarik u jylliew, 2023 ka la pynlong ïa ka jingai jingpynshai halor ka Jan Bhagidari kum shibynta ban pynsngewthuh halor ka thong jong ka jingïalang G20 ba long ha ka ri India jong ngi, ka National Education Policy (NEP) 2020 bad Foundational Literacy &Numeracy (FLN) kaba la shim bynta da ki nonghikai na ki katto katne ki skul bad ki khynnah skul.
U bah Staising Kharbteng u Sub Inspector of Schools u la long u kongsan bad ha ka jingkren jong u, u la pynpaw ba ka thong jong ka Jan Bhagidari ka dei ban pynshlur ïa ki nongshong ka ri ban ïasnohktilang bad ka sorkar ban pyntyllun ia ki mat treikam jong ka na bynta ka jingkiew shaphrang ha baroh ki liang. U la pynpaw ruh ba ha kaba ïadei bad ka NEP bathymmai ka thong kaba kongsan ka long ba ki khynnah skul ne samla pule ki dei ban mih shakhmat khlem lehraiñ ban pynpaw ïa ki sap ba ki don khnang ba kin lah ban pynwandur shuh shuh da ka jingïarap ki nonghikai ba kin lah ban ïeng ha la ki jong ki kjat ha ki sngi bad por ban wan ha kano kano ka sap ba ki don.
La ïoh ïa ka jingkren na i Babu Wando Nongbet, Asst. Lecturer ka Maharam Govt. Higher Secondary School halor ka phang jong ka G20, da kaba pynpaw ba ka thong ba hakhmat eh ka long ban pynneh pynsah ïa ka mei mariang, ka jingshong shngaiñ bad ban kyntiew ïa ki kam pynroi hapdeng ki jingïakhun kiba bun (growth amid challenges).
U K. Madhuchandra Singh, u I/c Principal ka JNV, Mawkyrwat u la batai ïa ki mat bad thong jong ka National Education Policy 2020 bad ruh halor ka FLN ba kumno ki khynnah skul ki dei ban long shlur ban mih shakhmat ban sei ïa la ki sap ba ki don bad ka bynta jong ki nonghikai ban ai mynsiem shuh shuh ia ki khynnah skul khnang ba kin lah ban pynjanai khambha shuh shuh na bynta ka lawei baphyrnai jong ki.
La ïoh da ka jingkren ai khublei na u Babu Bording Lyngdoh Asst. Teacher, Maharam Government Higher Secondary School.
