Nongstoiñ, Jylliew 13: Namar ka jingud jingnam jong ki paitbah nongshong shnong ka thaiñ Rambrai halor kiba bun ki jingeh ba kiba pang ba shitom na ka daw jong ka jingbym biang jong ka kali kit nongpang ha ka jaka sumar kaba don ha Nongkroh (Rambrai), ki nongïalam ka Federation of Khasi Jaiñtia and Garo People Rambrai circle, ha ka sngi Baar ki la leit ban jurip ïa katei ka jaka sumar bad ki la lap ba ki nongtrei ki biang bad ki trei shitom bha. Hynrei ki shem jingeh haduh katta katta ban ai ka jingshakri kaba biang ïa ki paitbah kiba shong ha ki shnong kiba jngai bha, namar ba ym don kali kit nongpang satia.
Ki nongïalam ka seng ha katei ka sngi ki la lap ruh ïa ka jingshisha ba ka ambulance kaba don ha phyllaw jong katei ka jaka sumar ka la sop da ki ñiuh kseh bad u sohpailen suda.
U bah Jiedstarland Lyngkhoi president ka seng haba ïakren bad u nongthoh khubor, u la ong ba ka kali kit nongpang kaba don ha phyllaw jong katei ka jaka sumar, kam long shuh ban pynïaid la palat shi snem. Hynrei na ka liang ka sorkar kam shym la shimkhia ban pynbiang kali kit nongpang ha katei ka jaka sumar.
U la ong ruh ba ha katei ka jaka sumar ki jaka sah jong ki nongtrei ruh kim biang, ka um ruh kam biang bad ka la buh jingeh haduh katta kata ïa ki nongtrei bad ki paitbah kiba wan sha sumar.
U la ong ruh ba halor ka jingbym biang jong ki jaka sah ki nongtrei, ka um bad ka kali kit nongpang, na ka liang ka seng kan sa leit ban ïakynduh ïa u District Medical & Health Officer, ban ïakren halor katei ka jingeh. Ka seng ka la kyntu ruh ïa ka sorkar lyngba u Director jong ka tnad ka khiah, ba kan shimkhia lem ban pynbiang ïa ki jingdonkam ha katei ka jaka sumar na ka bynta ka jingbit jingbiang jong ki paitbah.
Ha katei ka sngi la ïoh ruh ban ïakren bad ki paitbah kiba wan phah sumar ha katei ka hospital, ha kaba ki la pynpaw ïa ka jingsngewkhia halor ka jingbym don kali kit nongpang ka ban ïarap ban pynpoi ïa ki ba duk ba kyrduh sha katei ka jaka sumar haba ki shitom.
U bah Srim Lyngkhoi na ka shnong Mawrok u la ong ruh ba kiwei pat ki shnong kum na ka shnong Mawkhiat, Rynñiaw, Domkyrkoh bad kiwei kiwei kiba dei ki shnong bym pat don surok, lada don ba shitom ki hap ban kit da u briew bad ki hap ban ïaid da ka kjat kumba lai kynta tam haduh ban da poi ha ka jaka ba lait kali.
