Shillong, Jylliew 1 : Ka ïing bishar High Court jongka jylla mynta ka sngi Palei ka la bthah ïa ka sorkar jylla ban peit ïa ki jingeh ba ki paid nongshong shnong ki ïakynduh bad thaw lad kumno ban pynbun ïa ka um ha Umiam bad Mawphlang khnang ba ki paidbah kin lait ban duh umdih bad bording.
Haba bishar ïa ka mukotduma PIL ka Division Bench kaba la khlieh da u Chief Justice Sanjib Banerjee la pynmih ïaka hukum ruh da kaba ong “ Mynta ki paidbah ki donkam ban ïoh beit ka bording bad ka umdih hynrei ïa kane ym shym la lah ban pynbiang da ka sorkar jylla. Hooid kam dei ka kam ïa ka ïing bishar ban kren ïa kane ka kam hynrei haba ha kine ki sngi ki paidbah ki la ud la nam ïa kine ki jingdonkam ba kongsan tam naduh ka umdih haduh ka bording kumta kam banse ban shimti ïa kane ka kam”
Ka sorkar ka dei ban shim khia halor kine ki jingeh jongki paidbah bad thaw ki lad kumno ba kan pynnneh bad pyllang bun ka um ha Umiam bad Mawphlang.
ïa kane ka PIL la ujor da u bah Thomas Passah u Vice President ka KHNAM halor kane ka jingbym biang ka rukom pynïaid ban pynïoh umdih ïa ki paid jongka East Khasi Hills khamtam eh ha kane ka nongbah.
Kat kum une u nongujor la pynpaw ba nalor ka skhim Jal Jeeval Mission (JJM) bad ka Meghalaya Water Harvesting Mission bad nalor ba kane ka thaiñ ka dei kaba pahuh slap bha ym sngew don daw shuh ban ong ba ki paidbah ki kyrduh umdih ne ba dang duna ka um ha kane ka jylla.
Ka ïing bishar ka la bthah ïa ka sorkar jylla ban ai jubab hakhmat ka ïing bishar ha lane shwa ka 12 tarik Jylliew.
