Nongstoiñ, Ïaiong 26: Ha shuwa ba kin mih noh na ka District ban leit ïashim bynta ha ka lympung Meghalaya Game ka ban long ha Nongbah Shillong, na ka liang u MLA ka Nongstoiñ u Bah Macmillan Byrsat ha ryngkat ka jingïadonlang ki nongïalam ka Nongstoiñ District Sports Association, ha ka sngi ba ar u la leit ban ai khublei bad kitbok kit rwiang ïa ki rang bad thei ïalehkai jong ka District, ba kin lah ban ïalehkai bha bad ban wanrah burom ïa ka dong ka thaiñ lyngba kane ka lympung.
Haba ai jingkren khublei kitbok, na ka liang u MLA u la kitbok kit rwiang ïa ki samla ki ban mihkhmat ïa ka West Khasi Hills kumjuh ki samla ki ban mihkhmat ïa ka Eastern West Khasi Hills, ba kin ïoh ïa ka jingjop don burom ha kane ka lympung Meghalaya Game 2022.
U la ong, “Teng teng kum ki nongmihkhmat ngi kum leh klet ha ka ba ïadei bad ki jingïalehkai sport bad ngi kham buh hakhmat ïa ki kam pynroi kum ki surok, ki school bad college, ka umbam umdih, ki jaka jngohkai pyrthei bad kiwei kiwei hynrei u ngeit skhem ba nangne shakhmat ka sorkar kan phai khmat ha ka ba ïadei bad ki kam ïalehkai”.
U la ong ruh, “Haba peit ha kiwei pat ki jylla bad ki ri ka pyrthei, ngi ïohi ba kano kano ka jait jingïalehkai ruh ka long ka lad ai kam ai jam kaba lah ruh ban wanrah ïa ka ïoh ka kot ha ka jylla bad ka Ri hi baroh kawei”.
Shuh shuh hadien ka jingpynpaw jong ki nongïalam ka NDSA halor ka jinghiran pisa na ka bynta ban pynbiang ïa ki jingdonkam ki rang bad thei ïalehkai, na ka liang u MLA u la kular ba un sa bhah kyrpang ka jingïarap sha kitei ki samla, khnang ba kin lah ban pynbit pynbiang ïa la ki jingdonkam.
