Jop ka Meghalaya ia ka khusnam UN Award – World Summit on the Information Society Forum

Shillong, Iaiong 25 : Ka program jong ka tnad planning ka e-Proposal System, ka ba dei ka bynta jong ka Meghalaya Enterprise Architecture (MeghEA) ka la ïoh ïa ka khusnam UN Award – World Summit on the Information Society Forum (WSIS) Prizes 2022.
Ha kane ka juk digital, ka la don ka jingdonkam ba kyrkieh ïa ka jingpathai jingtip- ym tang ban pynbha ïa ka jingshakri lyngba ka digital hynrei ruh ban lah ban pynbiang ïa ki jingdonkam jong ki paidbah bad ban thaw ïa ki seng. Haba shimkhia ïa kane u myntri rangbah u Conrad K. Sangma ha u snem 2019 u la pyllait paidbah ïaka MeghEA, ia kaba la pyntreikam da ka tnad Planning, ka Sorkar Meghalaya.
Ka Meghalaya kala shah jied napdeng ki 360 tylli ki project na kylleng ka pyrthei, ha kaba sdang jong u snem. Na kine, ka UN ka la jied ïa ki 5 tylli kiba wan shakhmat ha ki 18 tylli ki kyrdan bad ka la pynkhamti ïa ka khusnam Champion Project. Ka Meghalaya ka la shah jied mynta ka sngi ha ka UN kum ka Champion Project ha ka kyrdan- “The role of governments and all stakeholders in the promotion of ICTs for development”, ryngkat bad kiwei kiwei de ki project na Australia, China, Argentina bad Tanzania. Kawei na kine ki 5 tylli ki project ba wan shakhmat yn sa pynbna kum ka lahduh. Ka Meghalaya e-Proposal System ka don ka jjingkyrmen ban ïoh ïa ka namjop ïa kane ka khusnam ruh, ha kaba ka jingsam ïa ka khusnam kan long haka 31 tarik u Jymmang ha Geneva, Switzerland.
Mynta ka e-Proposal system ka pynbiang ïa ki jingmang bad jingpdiang jong baroh ki tnad bad ki directorate ha Meghalaya bad ban ai ïa ka jingshakri ka sorkar ryngkat bad ki jingpyndep hok ïa ka kamram sha baroh ki nongshong shnong ha kylleng ka jylla Meghalaya haka rukom kaba shai bad babeit. Ka pynduh pyndam ïa kumba 75 naka 100 ka rukom treikam da ki kot ki sla ha ki tnad Sorkar.
Mynshwa ïaka jingmang bad jingpdiang kan shim por da ki bnai ban pyndep, hynrei mynta pat kan ym shim por palat ïa ki taiew. Kane ka jingsdang ka la kyrshan ïa ka jylla ban bud ryntih bad ban khmih bniah ïa ki skim bad ki jingpdiang, tang da kaba shu shon ïa u budam. Nalor kata, ka jingïalong lang bad ka tnad pla tyngka ka sorkar ban pyndep ïa ka jingphah pisa bad ka jingïoh jingmyntoi ki nongshong shnong, ka la long ka jingkylla bakhraw haka rukom treikam bad jingshakri.
Haba kren ha kane ka sngi, u Dr. Vijay Kumar D, Commissioner & Secretary jong ka tnad Planning, u la ong “Ngi sngewnguh ïa baroh kiba la vote ïaka Meghalaya Project ban wan haka kyrdan ka ba 5. Ngi sngew ba ka e-Proposal System kan long ka jingpynkylla ha ka rukom synshar khadar bad kan ai mynsiem ruh ïa kiwei pat ki jylla ha ka ri ba kin pyrthuh bud ïa kum kine ki rukom treikam ba ïasyriem”.
Ka MeghEA ka dei ka program jong ka Sorkar Meghalaya, ba la kyrshan da ka National e-Gov Division (NeGD), kaba nyngkom tam ha ka ri. Ka KPMG ka dei ka paralok ba ai jingmut ïa ka MeghEA katba ka Humanitics, NIC bad kiwei kiwei ki dei ki tnad ba pyntreikam.