Shillong, ïaïong: ïa ka “Book Fair Fest” ne ka ïew diew kot ka ba ar sngi kynthih ba la pynïaid da ka Central Library & IQAC of Shillong College ha ryngkat ka jingïatreilang bad ka Shillong Commerce College bad College of Teacher Education (PGT) Shillong la plie hynne ka sngi ha auditorium ka Shillong College, Laitumkhrah, Shillong.
Ha kane ka prokram la wan ïashim bynta da ka ka Dr. (Mrs.) E. Kharkongor, Principal Shillong College, Dr. (Mrs.) S. Sen, Principal of Shillong Commerce College, Dr. (Mrs.) B. Tron, IQAC Coordinator College of Teacher Education (PGT) Shillong, Prof. B. Syiem, Vice Principal Shillong College (Self-financing Course), Prof. K. D. Roy, IQAC Coordinator of Shillong College bad kiwei kiwei.
Ha ka jingkren ka Dr. (Mrs.) S. Sen ka la pynpaw halor ka jingdonkam ban pule ïa ki kot bad ka pynshlur ruh ïa ki khynnah pule ba ki dei ban pynmlien ha ka ba pule kot khnang ba kan tei ïa ka jingnang jingtip ka jong ki.
Ka Dr. (Mrs.) B. Tron ha ka jingkren ka la ai ka jingïaroh ïa kine ki kynhun jong ki college ki ba la lah ban pynlong ïa kane ka ‘Book Fair’ bad pynpaw ruh halor ki lad ki kabu ki ba lah ban plielad plie lynti lyngba ka jingsmat ban pule kot na ka bynta ki khynnah pule bad ki nonghikai kumjuh.
Nalor kata ka la ïai ban ruh halor ka jingdonkam ka ba ïadei bad ki copy right bad kyntu ruh ïa ki khynnah pule bad ki nong hikai ba ki dei ban kynmaw bad burom ïa ki jingtrei jong ki trai nongthoh khnang ba baroh ngin lah ban noh synñiang ha ka ban kyntiew ha ka liang ka thoh ka tar.
Kumjuh na ka liang ka Dr. (Mrs.) E. Kharkongor ka la ai ka jingïaroh ïa ka kynhun na kine ki college ki ba la lah ban pynlong ïa kane ka book fest bad ka pynshlur ruh ïa ki samla pule ba ki dei ban pynmlien ban pule tista ïa ki kot khnang ba kin lah ban kyntiew ha ka ba ïadei bad ka jingnang jingtip ha ki ba bun ki liang.
La pynkut ïa kane ka prokram da ka jingkren ai jingkhblei na i Kong B. Lyngdoh, Librarian ka Shillong College.Ki ba bun ki kynhun nong die kot ba pawkhmat bad ki nong pynmih kot ka jylla ki la wan iashim bynta ha kane ka ïew die kot, kata kynthup ruh ïa ki samla pule bad ki dkhot na kitei ki laitylli ki college.
