Shillong, Ïaïong 25: Ka Meghalaya kala rem noh da 1-0 kol ha ka Punjab ha ka jingïakhun kaba khadduh na ka Group A jong ka lympung ïalehkai senior men’s National Football Championship, Santosh Trophy ha ka jingïakhun kaba la long ha ka miet sngi U Blei ha Manjeri Payyanad Football Stadium, Kerala. Da kane ka nam rem ka Meghalaya kala khyllem syndon na katei ka lympung ïalehkai.
Ka kynhun ki rangïalehkai ka Meghalaya ha ki saw sien ïakhun ha ki hynñiew sngi ka khlem lah ban thep kol, bad ka ïoh ban thep phra kol ha ki laisien ïakhun.
Ka jingïakhun hapdeng kine ki ar tylli ki team ka long kaba ïakhaid bha ha kaba ha kaba kut jong ka kylla step ym don ba lah ban ïapynkih jar. Dei ha ka kylla miet mar syn sdang ka jingïalehkai ka Punjab kala ïoh ban thep ïa ka kol lyngba u Amarpreet Singh ha ka minit ba 47. Watla ka Meghalaya kala kheiñ sting ba u Amarpreet u don ha ka liang ka offside, hynrei u linesman u khlem rah ïa ka lama bad da kaba suk ula ïoh ban thep kol.
Ka Meghalaya kala ïakhun tyngeh hynrei ka khlem lah thaw pyrthei haduh kaba kut jong ka jingïalehkai. Ha kaba kut jong ki 90 minit la aitam da phra minit bad ha kane ka por u rangap kol ka Punjab u la mynsaw noh bad hap shong ben, hynrei ka Punjab kala lah ban kyrda ïa katei ka shi kol bad khur pura ïa ki lai point. Hadien saw sien ki jingïakhun, ka Meghalaya kala pyndep da kaba khur saw point ha kane ka lympung.
