U Conrad u la shu thok bad shukor ïa ki paidbah kynnoh u Dr Mukul

Shillong, Iaiong 24 : U Nongïalam ka Liang Pyrshah u Dr Mukul Sangma u la kynnoh ba u Myntri Rangbah ka jylla u Conrad K Sangma u la shu thok bad shukor ïa ki paidbah ha kaba ïadei bad kane ka kam pynbeit pud bad ka Assam.
“ U Conrad u la pynmong bad pynbitar palat ïa ki paidbah namar u la shu thok shu shukor ïa ki halor ka jingpynbeit pud. Kane kam dei ka jingpyndom ne leh bym kheiñ briew ïa u Dr Mukul hynrei u leh ïa ki paid nongshong shnong ka jylla” ong u Dr Mukul.
U la ong ba ka sorkar MDA kat kum ka MoU ba la ïasoi ka la dep ai sha ka Assam ïa ka Khanapara, ka Ganesguri bad ka Maikhuli.
U la ïathuh ki kot ki sla ba la ai sha ka Assam ha u 2011 ki dei ki kot kiba ka sorkar Meghalaya ka kam ba kitei ki jaka ki dei ban neh ha ka Meghalaya ym dei ban phiah ïa ki bad ai sha ka Assam. U Dr Mukul u la ong “ Ki ong da ka jingïa ai bad ïashim mar kylliang hynrei ki jaka jongno ki kwah ban ai? U Conrad u ong ba ngi la ïaid palat ban ïa ki jaka ba ïakaji, kane ka pynpaw ba um sngewthuh ei ei ïa kane ka kam. Nga sheptieng bad nga la ju pynpaw ruh la bun sien wat hapoh ïing Dorbar ruh halor ki jingshisha, hynrei ki ïa rkhie pynban ïa nga”.
U la ong ba ka Assam kam ju wan shakhmat ban ïakren pynbeit pud hadien ba la dep ban ai ïa kitei ki kot ki sla ba don nongrim jongka jylla halor ka jingkam ïa kitei ki jaka ba ïa kajia ba ki hap hapoh Meghalaya ha u 2011.
“ Nga tip shai ba ka Assam ka sngewthuh ba lada ïakren halor kane ka kam u Dr Mukul un ym pyndem satia namar ngan ym ai hi ruh ïa kine ki jaka sha Assam. Ngan ong biang ba da lei lei ruh ngan ym ai satia. Ki tip ïa kata bad dei na kata ka daw ki shim kabu kloi mynta ba ïalam ïa ka sorkar da u Conrad K Sangma ban ïoh leh katba mon” kynnoh u Dr Mukul.
“ Ki la shu leh kyrkieh ïa ka kam, katno sien ki jingïakynduh jong u Conrad Sangma bad u Himanta Biswa Sarma bad katno sien ki ïa kynduh ban bishar bniah shwa ban ïasoi ïa katei ka MoU kata ruh ha ka sngi Shuti. Namar phi tip hi u Nohprah bad u Kyllalyngkot ki dei ki bnai ba ki paidbah ki kham ïa pynlut por ban pynkhreh ïa ka Khristmas bad Snem Thymmai, kumta katno por u pynlut ban bishar bniah ïa kane ka kam” ong biang u Dr Mukul.
U la ong ka Malchapara, Malang Salbari, Malangkhona ki dei ki jaka jongka Meghalaya bad kim dei kiba don jingïakajia, hynrei ïa kine la aiti da u Conrad sha ka Assam nalor kata ïa ka maikhuli ruh la phiah noh bad mano ba aibor ïa u ban phiah mar shiteng ia katei ka shnong.
U Dr Mukul u la ïathuh “Na ka por sha ka por nga la maham ïa ka sorkar ban ïaid suki ban ym pat ïasoi ïa ka MoU hynrei ki ïa rkhie ïa nga namar kim sngewthuh ïa ka kam”
U Dr Mukul u la ong “ Kynmaw u Dr Mukul um lah ban thaw ïa ka map ba thymmai jongka jylla kumjuh ruh kane ka sorkar kam lah ban thaw thymmai ïa ka map thymmai jongka jylla namar kam ïahap bad ka map jongka tnad Revenue. Na kata ka daw nga sa ong ba ia kiei ki kot ba la ai bad kam la pynshisha da ki kot ki sla kiba la pynmih da ka tnad Revenue na ka por sha ka por. Kumta ïa ka map ba rim la pynshong nongrim halor ki kot bad jingshisha ïa kito kiba hap hapoh ka hima Nonglang, hynrei kaba nga lyngngoh ka long kumno ïa ka jaka jongka Hima la ai sha ka Assam bad kane ka dei kaba u Conrad u dei ban pynshai ym dei ban kren kyllaiñ da kumne kumtai”
“ U (Conrad) la ong u Dr Mukul ula soi, phi ïohi ïa ka jingsoi jong nga ha kita ki jingthoh? U tip bad mut ïaleh kai bad ki paid Garo bad ki paid ka Meghalaya da kaba thok bad shukor ïa ki? Ki paidbah kin sa ai ka jubab” pynkut u Dr Mukul Sangma.