Shillong, ïaïong, 24: Ka jingshim rai jong ki nonghikai skul Adhoc ban bteng ia ka jingiakhih kaba khem pud sngi da kaba pynlong ia ka Non-Cooperation Movement (NCM), la ioh jingtip ba ka Meghalaya Board of School Education ka la khot kyrkieh da ki nonghikai jong ki skul Private ban pynbeit ki jubab eksamin SSLC bad HSSLC jong ki khynnah skul.
Ha ka sngi Thohdieng, ka 22 tarik mynta u bnai, ka Federation of All School Teachers of Meghalaya (FASToM) ka la shim ia ka rai ban bteng ia ka jingiakhih kaba khlem pud sngi da kaba sangeh ban leit shim klas sha skul, ban ym leit sha pynbeit ia ki jubab eksamin jong ki khynnah skul kiba iakhun ia ka eksamin SSLC bad HSSLC bad ban ym iashim bynta ha kino kino ki kam kiba la bynshet da ka Sorkar.
Ka Seng ka la shim ia kane ka rai hadien ba ka jingiakren bad u Commissioner and Secretary ka tnat Pule Puthi ka Sorkar Jylla u Dr. BDR Tiwari kam shym la poi shano shano ruh.
Kum ban shu pynkynmaw hangne, ka FASToM ka la pynlong ia kane ka jingiakhih ba khlem pud sngi hadien ba ka Sorkar Jylla naduh u snem 2019 ka dang iai eksamin ia ka jingtyrwa jong ka FASToM ban kyntiew kyrdan Deficit Pattern/Deficit System lane ban pynkiew da ka jingsiew ba T.18 hajar ryngkat bad ka jingpynkiew tulop kaba 5% manla u snem.
Dang shen u Myntri ka tnat Kam Pohing u Bah Lahkmen Rymbui u la kren da kaba shai lyngba ki lad pathai khubor ba ka Sorkar Jylla kan ym lah satia ban kyntiew kyrdan Deficit Patten/Deficit System ia ki skul Adhoc.
U kyrwoh ba la phah da u Nongaiktien ka FASToM u Bah Mayborn Lyngdoh, u ong, “ki don ki khubor hamasaia kiba iathuh ba ka Sorkar ka la khot da ki nonghikai skul Private ban pynbeit ia ki jubab eksamin namarba ba ki nonghikai skul Adhoc kiba la tbit ki la rai ban pynlong da ka Non-Cooperation Movement (NCM).”
“Kane ka jingleh jong ka Sorkar kan buh ia ka lawei jong ki khynnah skul ha ka jingma. Lada kane ka dei kaba shisha, ka paw pylleiñ ba ka Sorkar ka dang kham lah ban shu leh mynthi bad ban buh jingma ia ka lawei jong ki khynnah skul ban ia kaba kaba pynbeit ia ka jingeh jong ki nonghikai skul na ka bynta ka jingbha lang ia baroh,” ong une u nongialam ka FASToM.
Haba pyrshang ban tohkit halor kane na u Deputy Director jong ka Meghalaya Board of School Education, Shillong u Bah M. Marbaniang u la ong ba kam don satia kano kano ka jingktah namarba ka MBoSE ka ladep pynbiang lypa ia ki nonghikai naduh kaba sdang khnang ba kan ym don kano kano ka jingktah ia ka jingpynbeit ia ki jubab eksamin hadien ba ki nonghikai skul Adhoc ki la pynbna ia ki jingiakhih.
