– HT Wells
Shillong,Ïaïong 24: Sa tang shiphew bnai kynthih, ka lyer lection MLA 2023 ka la sdang ban beh pyrhut ha rilum Khasi Jaiñtia bad wat ha rilum Garo ruh kumjuh. Ha kine ki khyndiat sngi,ki la sdang mih ki ‘aya Ram ki gaya Ram’ kaba mut kiba ïakynthih party na kawei sha kawei pat.Haba sngap ïa ka jinglong jingman jong ka saiñhima sima,imat ki ban ïakhaid te kin dei hi hapdeng ka NPP bad UDP. Hynrei kaba sngewthamula ka long ba kito ki gaya Ram ne ki politician ba mih na ki party rilum bad wad jaka ha ki skum basyiad jong ki national party ki kynnoh ba ki party rilum ki kut tang ha Byrnihat bad kito pat kiba la don ha ki national party kiba wad jaka riehtngen ha ki party rilum ki kynnoh ba ïa ka sur pynsawa jong ki la shah set gag namar ym don ba sngap satia ïa ki jingeh jong ki.
Ha kine ki phewsnem ba la leit noh ngi sakhi ba lada ki ïalam u Khasi ïa ka sorkar um ju neh baroh sansnem hynrei haba ïalam u Garo ka neh kumba kynthah paiñ. Ka daw kam dei satia na ka jingbun MLA jong ki hynrei ki dei ka jingkyrshan ba radbah hi jong ki briew lajong nangne.Kum ban shu jer, u Capt.W.A. Sangma, Purno Agitok Sangma,Salseng C Marak, Dr Mukul Sangma bad u Conrad K Sangma ki neh baroh sansnem; don ruh kiba la neh arsien ha ka shuki Chief Minister. Ka ratio ka dei hi 36 : 24, te balei pat ï. Kumba jia myn ha kane ka election MLA 2018, sa tang shi ksai la dei ban ïoh CM da u briew lajong pynban ka jngai thiaw. U Bah Darwin Diengdoh Pugh, Brington Buhai Lyngdoh, Donwa Dethwelson Lapang, J.Dringwell Rymbai, Evansius Kek Mawlong, Dr Donkupar Roy kim lah ban pyndep pura ïa ka pali jong ki na ka daw jong ka raibi ïatan kjat kum ki tham India. Lada kylli na kitei ki rangbah,kin ïathuh beit ïa u soh ba kthang jong ka jingshah shetkylla ba ki mad namar ka jingïadung tuh ka jur. U Ma Sing Mulieh kham katto katne snem mynshwa, haba ïakren shaphang ka sorkar-synrop u ong,ïathiah te ïathiah lang tangba hap ïabat mar kawei ka dagger hapoh nep. Haba jubab ïa ka jingkylli jong ki nongthohkhubor balei ba ka sorkar lailama ka khyllem, U Bah BB Lyngdoh u ong, “ki minister jong ngi wat ïa ka rong kali ruh ki ïaknieh, te yn ong kumno”. Ka sngewbiriahynrei ka dung ngak.
Kumba ka long mynta ka United Democratic Party (UDP) ka don ka jingkyrmen ban long ka single largest party ha ka election 2023. Hadien ka jingpait jingpra jong ki national party kum ka Congress bad kiwei, i kumba ki briew ki la kwah ban kyntiew biang ïa ka UDP ha ka bor. Hynrei haba pyrshang ban swait na ki katto katne ngut ki riewïohi-jngai, ki sngew sheptieng ïoh kato ka ksuid tan kjat ka treikam biang hadien bym lah ban pynbiang dohkyndang kumba mih ka APHLC (A), ki MDP bad kiwei kiwei wat la u paidbah u la ai ïa ka rai tang kawei ka party rilum ba kham khlaiñ. Ngi tip bha kaei kaba jia ïa kane ka party ha ka snem 1998, ka UDP ka jop haduh 20 seats bad na kitei ka la thaw record ruh ha ka history ba na Jaiñtia ka la pynmih ïa ki 7 jaiñspong. Kata; u Riang Lenon Tariang, Simon Siangshai, Oliverneat Chyrmang, Mihsalan Suchiang, H.Britainwar Dan, Kyrmen Susngi bad Sing Mulieh, hynrei katei ka record kam poi shano shano, kaba kut ka Jaiñtia ka sahdien kumjuh. Ha ka jingshisha u Bah E.K. Mawlong u dei u briew uba ki para MLA ki dei ban pynneh haduh bakut hynrei namar katei ka raibi ïatankjat, ïaknieh heh, pulom ka kabu ksiar jong katei ka sansnem.
Ha kane ka kynti ki briew na UDP kiba don jingkyrmen ba lah ban ïalam, dei u bah Metbah Lyngdoh, Bah Jemino Mawthoh, Bah Paul Lyngdoh. Hynrei ban shim nongïalam hap ban pha (sacrifice) ïalade. Nalor nangta,ym tang ka jingpynhun ïa ki para MLA, ki seng ba laiphewjait ha ka imlang ka sahlang ruh ki kwah ïa la ka jong ka bynta. Dei hangne ba ka jingkylli ka mih balei ba mih bun palat kum kita ki seng (pressure groups), ka daw ka long ba ka tlot palat ka sorkar, ban tehlakam ruh ym nud, hap ban pynhun (compromise) lut ïoh ki sei madan ïa ki jyrsieh. Ban long nongïalam ha ka sorkar donkam u briew uba lah ban kdup lang ïa kiwei pat ki jaidbynriew, tang ki jong lajong ym lah ban thaw pyrthei namar ka politics ka la khleh jaktung shaba palat.
Tangba tang kawei,ka jingkylli hato ka UDP ka lah ne em ban shim kabu (capitalise) ïa ka jingpait jingpra jong ki national party ï.U Bah Paul man ka por u kylli ïa ka leadership ha Meghalaya,don ne em ki briew batbit bad kiba lah ban sngap lem ïa kiwei pat ki para nongmihkhmat bad kiba tbit ban ïa aireng sha Delhi haba ka Jylla ka don ha ka khia ka shon. U nongthoh um pdiang ïa ka jingkynthoh u thylliej khlem shyieng ‘ba ki seng rilum ki kut tang ha Byrnihat’ namar ngi don kiba la bit ka rynïeng rynïot ban kyrshut tyrpeng bad kiba don ha Delhi ruh kum ki jong u Bah James Joy Mohan Nichols Roy, Hover Hynniewta & GG Swell . Ki issue babun ki don kum u pud u sam, ka ïohkam ïohjam, ki lyti synkien, ki school bah bad school nah, ki lad ai jingsumar,ka jingbymlah ban siew thikna ïa ka tukop ki nonghikai bad kiwei kiwei. Donkam ïa u briew uba ïohi jngai bad uba leh. Haba phai sha kawei pat ka liang, la phi beiñ katno katno ruh, u Conrad K Sangma u la leh la ka kam, 50 snem ym don sorkar ba patiaw ban pynbeit pud bad ka Assam hynrei une te u la leh halor ka “give and take policy”. Kiba im ha khappud ki sngewthuh khambha haduh katno ka sohsat. Dei hangne ba bun ki kynmaw ïa ka jingkren u bah BB Lyngdoh, u ksuid uba trei u kham lah shibun shah ban ïa ki angel ba ïohthiah.
Wat la ki ïatreilang, dei ka UDP hi ka ban ïakhait bad ka NPP. Kumba long mynta, ka BJP, TMC,Congress, HSPDP & PDF kim lah ban ïoh single largest party, ym dei ban sngewpher jaidbynriew hynrei ka por ka la dei ba ki seng saiñhima ki hap ban pynkhreh ban sei nongïalam da u Khasi-Pnar, lada ym ïoh da u briew lajong sa ha kane ka kynti te bha ba takor noh ïalade.
