Dawa ki paidbah ha Maikhuli ïa ka Sorkar MDA ban pyndam noh ïa ka MOU

Nongpoh, Ïaiong, 24: Katba dang mih ki sngi ka sur jingdawa ban pyndam noh ïa ka jingïasoi MOU hapdeng u Myntri Rangbah ka jylla bad u Myntri Rangbah ka Assam ba la aiti sha u Myntri ka tnad pohing ka sorkar pdeng ka la dang sawa jur na ki paid khappud ka Raid Marwet, bad ka daw hi ka long ba bun ki jaka jong ka Meghalaya la da shim katkum katei ka jingïasoi MOU kan leit noh sha ka jylla Assam ba ki paidbah nongshong shnong ki da pyrshah jur.
Kine ki jingshisha ba ki padbah khappud hapoh ka Raid Marwet bad kynthup ruh haduh ka thain Jirang ba kim hun satia katkum katei ka jingïasoi MOU, ka la paw pyrthei ruh ha ka sngi Saitjaiñ ha kaba da ki spah ngut ki paidbah khappud ki la wan ban shim bynta ha ka jingïaid paidbah bad ruh ha ka jingïalang paidbah ha ka shnong Maikhuli ba ki da pyrshah jur ba bun ki jaka ka Meghalaya kin leit sha ka Assam ba ki la kynnoh b akum ki paidbah kim tip ei ei bad la leh ïa kane ka kam tang da u myntri rangbah ka jylla Meghalaya bad ka Assam.
Ha kane ka sngi, la sakhi ba ki paidbah nongshong shnong khappud ka thain Maikhuli ba hap ha ka Raid Marwet da ki spah ngut ki la mih paidbah ban rah la ki Placard bad ki banner ban pynpaw ka jingpyrshah ba kim hun satia halor kane ka kam pynbeit pud pynbeit sam ki ar mynti ka jylla bad khamtam ïa ka jingïasoh ïa ka MOU ba ïa kane ka rai la shul eh tang da ki myntri rangbah khlem ka jingtip ki trai jaka, ki shnong, ki raid bad ki Hima.
Kumno ngi lah ban ai ïa ka jaka sha ka Assam ha kaba ha Meghalaya ïa ki khyndew ki shyiap la long trai da ki riew shimet katkum kata ka land Holding system bad ka sur ka sawa jam ruh kumo tang ki myntri rangbah ka jylla ki nud ban ïa soi ïa ka MOU khlem da tih bniah ïa ki jingshisha lyngba ki kot ki sla ne ki dulir ha kaba la shu shim rai khlem ka mon jong ki trai jaka ba dei hok ban ïoh ïa ka nongkynti kum kita ki trai jaka ki trai puta.
Nalor ki spah ngut ki paid khappud kiba la wan sha kane ka jingïalang paidbah, ha kane ka sngi la wan ai jingkyrshan ruh ïa ki da ka jingdonlang ki seng bhalang bapher bapher na Ri Bhoi, u Nongïasait aiñ ka jylla, u Bah Arwin K. Sutnga, u MDC ka Mawhati, u Bah Charles Marngar, u Sordar ka Hima Nongwah, u Bah Estansing Jana, ki rangbah shnong bad kiwei kiwei ki riew rangbah kiba la wan ban ai ka jingkyrshan halor kane ka jingïakhih ban pyrshah ïa kane ka kam pynbeit pud kaba kim hun satia.
Katkum ba la paw pyrthei ha kane ka sngi, naduh ka sur ki paidbah nongshong shnong katei ka thain khappud, ki nongïalam seng bhalang bad kynthup ruh ki riew rangbah ka phang kaba ki la pynpaw ka long ba ki da pyrshah jur halor kane ka jingïasoi MOU bad ruh ka jingpynbeit pud kaba khlem da tip ki paidbah bad ka rai kaba ki la shim ha kane ka sngi ka long ban dawa na ka sorkar jylla ba dei ban pyndam shuwa ïa katei ka jingïasoi MOU u myntri rangbah ka jylla Assam bad Meghalaya ba la ati sha u Myntri ka tnad ka kam pohing ka sorkar pdeng, u Amit Shah ba kim hun satia ba bun ki jaka ka Meghalaya ki la leit sha ka Assam bad ki la pynpaw ruh ba lada ym pyndam ïa katei ka MOU ba la dep ïa soi kin sa bteng ka jingïakhih bad kin nym shongkli kti bad ruh ba kin nym ai hi wat tang shi inshi ka jaka ban leit sha ka jylla Assam.
Hadien kane ka jingïalang, na ka liang ki paidbah lem bad ki nongïalam shnong ka Maikhuli ki la leit ban sieh biang sa kawei ka Signboard ha ka pung dohkha ba la kam ba kan hap noh sha Assam bad ha ka jingshisha katkum ki kot ki sla ne ki duir katei ka pung dohkha ka dei kaba dang hap ha ka jylla Meghalaya.