Nongstoiñ, ïaïong, 24: Ka jingbymhun jong ki paitbah ka thaiñ Malangkona ïa ka soskular pynbeit pud ba la ïasoi hapdeng ki ar jylla da kaba khynñiat ïa ki katto katne ki snong kiba hap hapoh u pud u sam jong ka hima Nonglang Sirdarship sha ka Assam, ka la pynlong ïa ki bun tylli ki sengbhalang ba kin hiar sha katei ka thaiñ ban sngap ïa ka sur jong ki paitbah khnang ban lap ïa ka jingshisha.
U nongïalam ka Hynñiewtrep Youth Council u bah Lumlang Kharsyiemlieh President ka HYC West Khasi Hills district unit, u la ïathuh ba hadien ba ki la ïoh jingtip bad ïohi lyngba ki lad pathai khubor ba ki paitbah katei ka thaiñ ki pyneh hi triang ba da lei lei kin ym leit sha Assam, ka seng ka la sngewkhia bad sngewlem ïa ki kumta ki la pynbeit ba kin leit ban ïa kynduh ïa ki paitbah ha Malangkona ha ka 30 tarik mynta u bnai kaba dei ka sngi saitjaiñ. Utei u nongïalam ka seng u la ong ruh ba ha katei ka sngi u bah Robertjune Kharjahrin president ka sengkmie bad kiwei ki nongïalam kin ïa poi lang ha katei ka jaka.
U bah Kharsyiemlieh u la pynkynmaw ruh ba ka hadien ba ki paitbah katei ka thaiñ ki la khihwin puk ban pyrshah ïa katei ka soskular ba la dep ïa soi, u bah Prestone Tynsong Symbud Myntri Rangbah ka jylla u la pynksan da kaba ong ba yn ym lah shuh ban khyllie biang sa shisien ïa ka soskular bad katei ka jingkren ksan jong u ka long kaei kaei ka bym lah ban pdiang.
U la ong ruh ba kaba kham sngewlyngngoh ka long ba hadien katto katne por u la pynksan biang da kaba ong ba lada ki jaka ki hap ha Assam ne ha Meghalaya ki trai jaka ki dei hi ki juh. Katei ka jingong jong u ka pynpaw shai ba um don jingtip ei ei ïa ka rukom bat khyndew bat shyiap ba ha Assam baroh ki jaka ki dei ki jaka sorkar bad lada ki nongshong shnong ki rep ki riang, ki trei ki ktah, ki thung ki tep ki hap ban da pan jingbit na ka sorkar bad ka sorkar ruh ka hap ban ai katkum ka jinglah jong ki tangba kan ym ai bun palat. Nalor kata ki paitbah ki hap ban siew khajna man la u snem ïa ki jaka rep jong ki sha ka sorkar.
Ha kajuh ka por u la ong ba ka rukom bat khyndew ha Khasi Jaiñtia pat ka khyndew ka shyiap ka dei ka nongkynti jong ki trai bad ka sorkar kam don hok ban shim khajna ne ban da ai bynta ba ki paitbah kin rep kin riang, kin trei in ktah. U la ong ba ka por ka dang biang ban pynthymmai biang ïa ka soskular katba ka Survey of India kam pat wan ban thew ban woh bad ban pruid laiñ ïa ka map, kumta ka sorkar ka dei ban sngap ïa kaei kaba ki paitbah ki dawa.
