Pynkhreh ka kong Aicifull K.Musulman ïa ka elekshon MDC, lum jingïalang ha Langpih

Nongstoiñ, Ïaiong, 7: Wat haba ka elekshon MDC ka dang jngai, hynrei ki don ki jaka kiba ka lyer ka la sdang ban beh jai jai kata ha ki shnong kiba kham kyndong jong ka Rambrai Jyrngam konstitwensi, ha kaba ki nongkyrshan jong ka kong Aicifull K.Musulman kaba dei kawei na ki longkmie kaba la ju angnud ban long nongmihkhmat, ha ka sngi palei ka la pynlong ïa ka jingïakynduhlang ha Langpih.
Ha katei ka jingïalang la ïapoi da ki spah ngut ki riew pawkhmat kiba na ka thaiñ Komphaduli, Kyrshai, Malangkona bad kiwei kiwei kynthup ïa u R.P Palïir, Freedom R.Marak, Prelion R. Marak Sordar ka shnong Komphaduli Nongmynsaw Syiemship bad kiwei kiwei ki riew rangbah kiba dang hap ha katei ka konstitwensi kynthup ïa ki jaidbynriew Khasi bad Garo bad kiwei kiwei ki la poi lang shrup.
Kum ban shu pynkyn-maw ka kong Aicifull Khar-Musulman, ka dei kaba shong ba sah ha ka shnong Mawrusyiar Nongstoiñ West Khasi Hills District bad ka ju trei kum kawei na ki nongsumar ïa ki khunswet ha ki snem kiba la dep. Hynrei, ka angnud ruh ban shakri paidbah lyngba ka jinglong nongmihkhmat bad ka la pyrshang ban ïeng kum ka kyrtong MLA na ka seng All India Trinamool Congress jong ka Rambrai Jyrngam konstitwensi ha ka election 2023. Pynban kam shym la ïoh tiket bad ka la shah pynthame ha ki bor kiba halor jong ka seng da kaba kular ai tiket MDC.
Kumta katei ka longkmie ka la ïaishah bad ïai ap bad ha kajuh ka por ka la ïarap ruh ban ïalap elekshon ïa u bah Fernandez Dkhar bad ïa u bah Macmillan Kharbani, kum kawei na ki nongkyr-shan kaba shitrhem. Hynrei, ka khubor kaba lah ban long tang kum ka hamsaïa pat ka ïathuh ba wat ïa ka tiket MDC ruh ka lah ban duh.
Haba ïakren bad u nongthoh khubor kitei ki riew rangbah kiba la jer kyrteng haneng ki la ong, “Ngi la ngiah ïa ki longkpa kiba la ngi la pynjop don burom baroh shi katta. Mynta ka kynti ha kane ka election ka ban sa wan, ngin kyrshan rad bah noh ïa ka kong Aicifull bad ngi dawa ruh na ka seng AITC, ba ka dei ban ai tiket ïa ka, lym kumta ngin pynieng wat kum ka kyrtong shimet ruh lada kam ïoh tiket”.
Ïa katei ka jingïalang la pynlong ha phyllaw ka skul Govt LP School Langpih bad la pynïaid da u bah Foldingstar Samakha kum u shongknor ha katei ka sngi. Katba na ka liang ka kong Aicifull K.Musulman pat haba kren bad u nongthoh khubor ka la ong, “Ka shong ha ki paidbah kaei ba kin rai kum ki nongkyrshan, namar kam dei ka rai jong ka hynrei kat haduh mynta ka kynti ka dang don ha ka seng TMC”.