New Delhi, ïaïong, 04: Hapoh ka jingïalam u Myntri Rangbah Duh, u Narendra Modi, mynta 60% ki iing ha ki jaka nongkyndong ki ïoh ïa ka um dih kaba khuid lyngba ki kor um. Palat 1.55 lak ki shnong (25% jong baroh ki shnong) ha India ki la pynbna ïa ka jinglong ‘Har Ghar Jal’, lane ka jingïoh baroh ki iing ha kine ki shnong ïa ka um dih kaba shngain ha la ïing. Ha une u snem, naduh u Kyllalyngkot haduh u Lber 2023, la pynpoi kawei ka kor um ha man ka sekon hapoh ka Jal Jeevan Mission. Kane ka dei ka kam kaba khraw, haba ha ki lai bnai ba nyngkong jong u 2023, la pynpoi ïa 2023, 86,894 tylli ki kor um thymmai man ka sngi, haba niew lang ïa baroh.
Ka Jal Jeevan Mission ka dei kaba la pynbna da u Myntri Rangbah Duh, u Narendra Modi ha ka 15 tarik, Nailar, 2019 da ka jingthmu ban pynbiang um (55ilcd) sha baroh ki iing ha ki jaka nongkyndong kaba long ka um kaba khuid bad kaba khlaiñ. Ka jinglut na ka bynta ka Jal Jeevan Mission ka long T 3600 billion (US $ 43.80 billion) kaba long kawei na ki kam na ka bynta ka bha ka miat kiba heh tam ha ka pyrthei. Ha ka por ba la sdang ïa ka Mission ha u Nailar 2019, na ki 19.43 klur tylli ki iing ha ki jaka nongkyndong, tang 3.23 klur (16.65%) ki dei kiba ïoh um na ki kor. Watla ki la don shibun ki jingthut ha ki snem ba la dep namar ka khlam, ka jingïathut hapdeng ka Ukraine bad Russia bad kiwei kiwei ki jingeh, ki Jylla / UT ki la trei shitom ban pyntreikam ïa ka Jal Jeevan Mission. Ka ri ka la kot sa ïa uwei u mawmer ha ka jingïaid sha ka ‘Har Ghar Jal’ ha ka 4 tarik u Ïaiong 2023, ha kaba 11.66 klur (60%) ki iing ha ki jaka nongkyndong ki la ïoh um ha la iing. 5 tylli ki jylla kiba long ka Gujarat, Telangana, Goa, Haryana bad Punjab bad 3 tylli ki Union Territory kiba long ka Andaman & Nicobar Islands, Daman Diu & Dadra Nagar Haveli bad Puducherry ki la pyndep pura 100% ïa ka kam. Ka ri ka dang ïaid sha ka jingpynpoi um kor sha baroh ki iing ha ki jaka nongkyndong ki ban ïoh ïa ka um kaba shngain lyngba ki kor um.
Ka Jal Jeevan Mission kam dei tang ka prokram na ka bynta ki jingdon jingem. Ka jingpeit jong ka Mission ka dei ban pynpoi ïa ki jingshakri ha kaba ïadei bad ka um kaba shngain, kaba biang bad kaba don man ka por. Ka jingsted bad ka jingïar jong ka jingpyntreikam ïa ka JJM ka dei ka bym pat ju ïohi. Ha tang kumba 3 snem, palat 8.42 klur ki iing ha ki jaka nongkyndong ba sah kumba 40 klur ngut ki briew (@4.95 ngut ki briew ha man ka longiing ha ki jaka nongkyndong, tyllong IMIS) ki dei kiba la ïoh jingmyntoi hapoh kane ka prokram. Kane ka long kham bun ïa ka jingdon briew ka USA (33.1 klur), jan ar shah ka jingdon briew ka Brazil (21 klur) bad Nigeria (20 klur), bad palat lai shah ka jingdon briew ka Mexico (12.8 klur) & Japan (12.6 klur).
Da kaba peit ïa ka koit ka khiah bad ka bha ka miat jong ki khynnah khyllung, la shim ïa ki sienjam kyrpang ban pynpoi ïa ki kor um ha man ki skul ha ki jaka nongkyndong, ki anganwadi centre bad ashramshalas (skul ki riewlum ba don jaka sah) ban don ka um dih, ka um ban shet bam, ban sait kti bad ban pyndonkam ha ki painkhana. Haduh mynta, ka jingpynpoi um lyngba ki kor ka long ha 9.03 lak (88.26%) tylli ki skul bad 9.36 lak (83.71%) tylli ki anganwadi centre.
Ka “Jingpynpoi ïa ka um kaba shngain” ka dei kawei na ki bynta kiba kongsan jong ka JJM. Ha ka por ba la sdang ïa ka JJM, ki la don 14,020 tylli ki jaka ba shah ktah ha ka Arsenic bad 7,996 tylli ki jaka ba shah ktah ha ka Fluoride ha ka ri. Ha kine ki 3 snem ba la dep naduh ba la sdang ïa ka JJM, lyngba ki sienjam jong ki Jylla/UT, ka jingdon kum kine ki jaka ka la hiar sha ka 612 bad 431. Wat ha kine ki jaka ruh, ka um kaba shngain ka don ïa baroh na ka bynta ban dih bad ban shet. Kumta, baroh 1.79 klur ngut ki briew kiba sah ha ki jaka ba shah ktah ha ka Arsenic lane Fluoride mynta ki ïoh ïa ka um kaba shngain ban dih bad ban shet.
La seng ïa 2,078 tylli ki jaka test um bad na kine, 1,122 ki dei kiba la ïoh jingithuh NABL. Ban kyntiew jingtip shaphang ka jingbha jong ka um, palat 21 lak ngut ki longkmie ki dei kiba la ïoh jinghikai ha ki jaka nongkyndong ban test ïa ki nongmuna da kaba pyndonkam da ki Field Test Kit (FTK). Tang ha u snem 2022-23, 1.03 klur tylli ki nongmuna um ki dei kiba la test lyngba ki FTK bad 61 lak tylli ki nongmuna um ki dei kiba la test ha ki laboratory. La sdang ïa ka campaign ‘Swachh Jal se Suraksha’ kaba kyrpang da ka Mission bad la ïoh jingtip shaphang ka jingtest ïa ka jingbha ka um ha 5.33 lak tylli ki shnong ban lap ïa ki dawai bad ha 4.28 lak tylli ki shnong ban lap ïa ki jaboh (hadien ka samoi slap) ha u snem 2022-23.
Ka jingkhlaiñ jong ki kam jong ka Sorkar ban peit ïa ka um ka paw haba ngi ïohi ba 1.64 klur tylli ki nongmuna um ki dei kiba la test tang ha u snem 2022-23, kaba long palat lai shah ka jingle ïa kine ki test ha u 2018-19 (50 lak). Kine ki sienjam kin ïalam sha ka jingduna ki jingpang ba pur na ka um ha ka ri.
Ïa ka JJM la pyntreikam ha ka rukom kaba kylluid, kaba shong nongrim ha ka jingdonkam bad kaba pynïaid da ka imlang sahlang. Palat 5.24 lak tylli ki Paani Samiti/ Village Water and Sanitation Committees (VWSC) ki dei kiba la seng bad palat 5.12 lak tylli ki Village Action Plan ki dei kiba la pynkhreh hapoh ka Jal Jeevan Mission ban peit, pynïaid bad sumar ïa ki jingdon jingem kiba ïadei bad ka jingpynpoi um.
Lyngba ka jingïashim bynta ki briew, khamtam ki longkmie, bad ka imlang sahlang ha ki jaka nongkyndong, ka Jal Jeevan Mission ka la long shisha ka jingïakhih paidbah lane ka ‘Jan Andolan’. Na ka bynta ka jingshngain ka jingïoh um kaba shngain bad kaba jrong samoi ka imlang sahlang bad ki Gram Panchayat ki la wan shakhmat ban bahkhlieh ïa ka jingpynïaid ïa ki kam pynpoi um ha ki shnong, ka jingpeit ïa ki tyllong um bad ka rukom pynïaid ïa ka um jaboh.
Ki Jylla/UT ki la ai jingkyrshan ïa ki Panchayat da kaba khot ïa ki Implementation Support Agency (ISA) ban plié lad ïa ka jingtei ïa ki VWSC, ka jingkyrshan ha ka jingpynkhreh ïa ki Village Action Plan bad ban pyntrei ïa ki kam hadien ba la tei ïa ki jingdon jingem. La khot ïa palat 14 hajar ki ISA kiba treikam mynta.
Ban pyntbit ïa ki briew bad khring ïa kito kiba don bynta ha kane ka kam, 99 tylli ki kynhun Sorkar bad ki kynhun shimet ki dei kiba la khot kum ki Key Resource Centre (KRC). Ka jingpyntbit ïa palat 18,000 ngut ki briew ka dei kaba dang ïaid shakhmat lyngba ki Key Resource Centre kiba la pynrung kyrteng hapoh ka Jal Jeevan Mission.
Shuh shuh, ban pynkhlaiñ shuh shuh ïa ki sienjam bad ai jingkyrshan ïa ki Jylla/ UT, ki tnat Department of Drinking Water & Sanitation ki la pynskhem ïa ka Rural Wash Partners’ Forum (RWPF), ha kaba kito kiba ïatrei lang bad kito kiba don bynta ha ki kam WASH ki la wan shakhmat ban ïatrei lang bad ka Sorkar India bad ki Jylla/UT na ka bynta ka jingpyntreikam bha ïa ka Jal Jeevan Mission.
Ka jingpynneh ïa ka um poh khyndew bad ki tyllong um ka long kaba donkam bha na ka bynta ka jingpynneh ïa ka jingai jingshakri ïa ki iing ha ki jaka nongkyndong. Ha kaba ïadei bad kane, ïa ka “Jingpynneh ïa ki tyllong um dih” (JSA-2023-SSDW) la buh kum ka phang kaba Pdeng jong ka Jal Shakti Abhiyan 2023. Kane kan wanrah ïa ka jingpeit bniah ïa ka jingtyngkai ïa ka um ban pynbha bad pynneh ïa ki tyllong um, khamtam ka um poh khyndew bad ki wah duid.
Ka Jal Jeevan Mission ka ktah ïa ka imlang sahlang ha ki bynta bapher bapher. Ka jingïoh ïa ka um lyngba ki kor ka pyllait ïa ki longkmie bad ki khynnah samla kynthei na ka jinghap rah um ban pyndap pynbiang ha la iing. Kumta, kine ki lah ban pyndonkam ïa kane ka por ba ki ïoh na ka bynta ka kamai kajih, ka jingïoh jinghikai ba thymmai bad ban kyrshan ïa ka pule puthi jong ki khun ki kti jong ki. Ki khynnah samla kynthei kim donkam ban pep skul ban ïarap ïa la ki kmie ban tong um.
Ka jingwad bniah da u Nobel Laureate Dr. Michael Kremer bad ka kynhun jong u ka la pyni ba 30% ka jingkhlad ki khynnah rit ka dei kaba lah ban lait lada ki longiing ki ïoh ïa ka um dih kaba shngain. Ka jingpang pynhiar ka dei ka jingpang kaba ki khyllung kiba dang shu kha ki ju kham ïoh. Ki khyllung kiba dang kha ki kham don jingma ban ïoh ïa ki jingpang kiba pur na ka um. Kane ka jingwad bniah ka ong ruh ba 1 na man ki 4 tylli ki jingkhlad (1.36 lak ki jingkhlad kiba hapoh 5 snem man u snem) kiba ïadei bad ki khynnah kiba hapoh 5 snem ka rta ki dei kiba lah ban lait lada lah ban pynbiang ïa ka um dih kaba shngain.
Ka JJM ka plié ruh ïa ki lad kamai jakpoh ha ki jaka nongkyndong. Ka jingwad bniah da ka IIM Bengaluru ka ong ba 1,47,55,980 ka jingïoh kam ki briew ha ka shi snem ka dei kaba lah ban don ha ki san snem jong ka jingpyntreikam ïa ka JJM. Kane ka long kumba 29,51,196 ngut ki briew kiba lah ban ïoh kam man u snem baroh shi snem ha ka bynta jong ka jingtei ïa ki jingdonkam jong ka Mission. Ka Mission kan plié lad ruh ïa ka jingïoh kam jan 10.92 lak ngut ki briew man u snem ha ka jingpeit bad jingpynïaid ïa ki lad pynpoi um.
