La tep donburom ïa met ba sah u Deenadayalan Vishwa, sngewnguh u coach ka TTTA ïa ka Meghalaya

Shillong, Ïaïong 19: Ïa ka met ba sah jong u Deenadayalan Vishwa, u rangïalehkai table tennis uba la khlad noh na kane ka sla pyrthei ha ka jingjia tyngkhuh kali shwa ban sdang ka lympung ïalehkai 83rd Senior National Table Tennis Championship, la tep don burom noh ha ka sngi Ba-ar ha Chennai.
Haba ai jingkren ha Nongbah Shillong, kaba la ïaid ar sngi jong katei ka championship, u coach jong ka Tamizagha Table Tennis Association (TTTA) kawei napdeng ar tylli ki synjuk ïalehkai na Tamil naduh u Ramesh Babu, u la pynpaw ba u Vishwa uba don ka sap ïalehkai u long thik kum u Sharath Kamal, da kaba ïathuh ruh ba utei u rangïalehkai u la khur bun tylli ki nam jop ha ki jingïalehkai hapoh la ka ri bad shabar ri ruh kumjuh ha ka jingïaid lynti jong u kaba tang khyndiat eh ha ka kyrdan junior bad sub-junior.
U Vishwa ha ryngkat u nongñiah u Dipal Das kiba wan sha Nongbah Shillong kila duh ei ïala ka jingim, hadien ka jingïatyngkhuh bad ka trok ha Shangbangla, Ri-Bhoi District. Ki lai ngut ki paralok ba ïalehkai lang jong u Vishwa ba kynthup ïa u R Santosh Kumar, D Kishore Kumar, S Abhinash Prasannaji kila mynsaw hynrei kila ïoh mih na NEIGRIHMS bad kila leit phai noh sha la ka jong ka jylla ha ka sngi Ba-ar.
Na ka liang u Babu u la ai khublei sngewnguh ïa ka Meghalaya Table Tennis Association, Ri-Bhoi police bad ïa ki bor pynïaid district kiba la ïarap halor kane ka jingjia haduh ba ka met basah jong u Vishwa kala poi ha Chennai ha ka sngi kaba bud.
Babu u la sngewnguh ruh ïa ki ar ngut ki rangïalehkai ka MTTA kata ïa u Joydeep Das bad Vikram Aditya ba kila ïarap bad donlang ryngkat bad ka kynhun jong u baroh shimiet ha ka Nongpoh.
U Babu u la ïathuh ruh halor katei ka jingjia ba ki 12 ngut ki dkhot jong ka kynhun TTTA kila mih da kaba shong ha ki lai tylli ki kali kamai.
Ki nongïalehkai jong ka kynhun TTTA kin bteng ban ïalehkai ha Shillong watla kala ktah shibun na ka jingduh noh ïa u Vishwa.