Pynliem ka Rahjingshai S&CC ïa ka PFR, ïakhaid ka Lumparing bad Maw U-Tieng

Shillong, Ïaïong 19: Ka Rahjingshai S&CC kala khur jingjop ha ka lympung ïalehkai Women Football League 2021-22 ba pynïaid da ka Shillong Sports Association (SSA) ha ka jingïakhun ha ka sngi Ba-ar ha madan MFA, Polo, Shillong, da kaba pynliem da 1-0 pyrshah ïa ka kynhun PFR Ft. Academy SC.
Katba ka Lumparing SC bad ka Maw U-Tieng SC kila ïakhaid noh da kaba ïathep mar shi kol.
Haba phai sha ka jingïakhun hapdeng kine ki saw tylli ki team, ka jingïalehkai ka long kaba itynnad bad ïakhaid bha. Ha ka jingïakhun kaba nyngkong hapdeng ka Rahjingshai S&CC bad PFR Ft.Academy SC, ïa ka shi kol na bynta ka Rahjingshai S&CC la thep da ka Lily L. Nongkynrih ha ka minit ïalehkai ba 23 bad haduh kaba kut jong ka jingïalehkai ka PFR ka khlem lah ban pynphai kol bad mad noh ka nam rem.
Ha ka jingïakhun kaba arsien hapdeng ka Lumparing SC bad Maw U-Tieng SC ka jingïakhun ka long kaba ïakhaid bha ha baroh arliang, bad hapdeng ka jingïakhun kaba itynnad bad shongshit bha, ka Inrilaidor Khongthaw kala plie pyrda da shi kol na bynta ka Lumparing SC ha ka minit ba 35 bad haduh kaba kut jong ka kylla step ka Lumparing kala lamkhmat da 1-0. Haba wanphai biang sha ka kylla miet, ka jingïakhun kala nang ïathnem ha baroh arliang, ha kaba ki thei ïalehkai ka Maw U-Tieng kila ïakhun tyngeh ban pynphai kol bad dei ha ka minit ba 52 kala wan urlong ha kaba ka Phibashisha Lyngdoh kala ïoh ban thep ïa ka kol pynïakhaid.
Da kaba ïathep mar shi kol, ka jingïakhun kala nang shongshit, hynrei haduh kaba kut jong ka jingïalehkai ki khlem lah shuh ban thep kol bad hun ban sam mar shi point.
Ka jingïalehkai mynta ka sngi 20-04-2022 ha ka jingïakhun kaba nyngkong kan long hapdeng ka Nongthymmai SC pyrshah ïa ka Lawei SC ha ka por 1 baje nohphai sngi katba ka Mawlai SC pyrshah ïa ka Thynroit SC ha ka jingïakhun ba arsien ha ka por 3:30 baje janmiet.