Shillong, Iaiong 18 : Ko ki seng saiñ pyrthei wat pynlong politik ïa ki ar tylli ki mat ba kongsan kata ha kaba ïadei bad ka kam ïa pynbeit pud bad kaba ar ha kaba ïadei ba ka Them Metor namar ka sorkar MDA ne ka sorkar ba ïalam da ka NPP ka khlem leh politik hynrei ka kwah ban pynbeit ïa kine ki kam na ka bynta ka jingsuk jong ka pateng ban wan namar lada ym lah ban pynbeit mynta kan ïai sahteng shi ïai sahteng kine ki kam, ong u Symbud Myntri Rangbah ka jylla bah Pretone Tynsong haba ïakren bad ki Lad Pathai Khubor mynta ka sngi.
“ Halor kine ki ar tylli ki issue ka jingpynbeit pud bad ka Them Metor nga kyrpad rit ïa ki para nongïalam Seng Saiñ Pyrthei sngewbha wat ïa pynlong politik namar ka sorkar MDA ne ka sorkar ba ïalam da ka NPP kam shym leh politik hynrei ka kwah ban pynbeit ïa kane ka kam na ka bynta ka jingsuk jongka pateng ban wan bad na ka bynta ka jingbit jingbiang u paidbah lym kumta ma ngi ki nongïalam ba mynta ngin sa shah tim ha ki pateng ban wan namar kane ka kam kan ïai sah teng shi ïai sahteng biang” ong u bah Prestone.
“Kumta kum ki nongïalam wat ong ba leh kyrkieh namar la 50 snem ym lah ban leh ei ei hangno ngi don ka jingïoh nong ym don ei ei ruh ka jingïoh nong shu duh nong suda bad teng teng ban pyntrei ïa iwei i kam pynroi ha khappud ruh ym lah, nga shu ai nuksa ïa phi kum ka Maikhuli uto u Lum Jingtep uba da ki phew snem ki paidbah kim lah shuh ban pyndonkam hynrei mynta ka Assam ka la ai biang sha ka Meghalaya ba kin pyndonkam ki paidbah, mano ba leh?, kane ka jaka kaba heh ka don kumba 6 haduh 7 acre ei ei la ai da ka Assam” ong biang u Symbud Myntri Rangbah.
U la ong kumba la ju kren na ka por sha ka por ha ka jingpynbeit pud ka plus bad minus ka don, ka don ka jingïoh nong bad ka don ruh ka jingduh nong hap ban mynjur na ka bynta ka jingmyntoi jongka pateng ban dang wan.
U la ong ba ki mih bun ki jingkynnoh bym don nongrim halor kane ka jingpynbeit pud, kum ka jingkynnoh uwei u nongïalam ka Congress ba u Myntri Rangbah u Conrad K Sangma u la ïoh nong da ki phew phew klur na kane ka jingpynbeit pud, kum kine ki jingkren ki long kiba shu kren laplah , shu kynnoh khlem nongrim bad ka jingkren khyllung khynnah, ka ktien ioh ei. “ Nga kyntu ïaki nongïalam ba shisha jongka jylla sngewbha sieh wat pyndonkam da ki kyntien kiba ym don nongrim bad kiba shu kren kumba kren ki khyllung khynnah namar kam don nongrim ei ei ruh kata ka jingkynnoh ïashna pisa na ka jingpynbeit pud bad jingpynbeit ïa ka Them Metor. Kane ka dei ka jingkynnoh kaba khlem nongrim satia. Nga kyntu ïa ki nongïalam jong baroh ki seng saiñ pyrthei, to ngin ïatrei lang bad ka sorkar namar ngi don hangne ban peit ïa ka jingbit jingbiang jong ki paid nongshong shnong jong ka jylla la ka dei ïa ka jingpynbeit pud ne Them Metor to ngin ïatrei lang namar lada ngim lah mynta ngin ym lah shuh lano lano ruh” pynkut u Symbud Myntri Rangbah.
