Khliehriat Iaïong 18: Hynne ka sngi na ka liang jong ka Seng Meghalaya People United Front East Jaiñtia hapoh ka jingïalam jong u president u bah kyrshan Blah ha ryngkat ka jingïadon lang u president jong ka ka Seng East Jaiñtia National Council Khliehriat circle u Ma Sanjoy Bareh ki la leit buh syndon da ka jingthoh hakhmat ka ophis treikam jong u Executive Engineer ka tnat MeECL ka ba don ha Mowakhu ka ba hap hapoh East Jaintia Hills, ha kaba ïadei bad ka jingbym don bording hapoh ka shnong Khliehriat East dong Pohshnong.
Na ka liang kitei ki ar seng ki la buh ruh ka jingkyrpad hakhmat ka ophis treikam ka MEecl ba kan sngewbha ban shimkhia lem mardor halor katei ka jingeh ka ba kum ki nongshong shnong ki la hap ban mad namar mynta la kumba artaiew kynthih katei ka shnong ka la mad jingeh namar ka jingbymïoh bording ka ba la ktah jur ruh khamtam ïa ki samla pule namar kim ïohlad ban pynleit jingmut ha ki jingpule ki jong ki khamtam ha ka por mynmiet.
Kumta na ka liang jong kine ki ar seng ki la dawa na kane ka tnat bording ba kan sngewbha ban maramot noh mardor ïa utei u transformer u bym shym la treikam shuh na ka bynta ka bit ka biang jong ki paidbah nongshong shnong.
Shuh shuh ha ka ba ïadei bad kane ka phang, na ka liang ka MPUF East Jaintia bad ka EJNC Khliehriat circle ki la ai por artaïew ïa ka tnat bording ban maramot noh ïa utei u transformer ba la sniew, bad ki la pynpaw ruh ba kin ym shongkli kti lada katei ka tnat bording kam shim khia ban pyntreikam ïa kane ka jingdawa ka jong ki.Kane ka long aktkum u kyrwoh lyngba u president ka MPUF East Jaiñtia Hills, u Ma Kyrshan Blah.
