Nongpoh, Ïaiong 18: Hadien ka jingshim bynta shitrhem jong ki khynnah skul haki 2 sngi naduh bala sdang haki jinglehkai sports bapher bapher, ka Seiborlang English Secondary School, Umshaken haka sngi palei kala pynkut noh ïaka lympung ïalehkai sports ki khynnah skul bala pynlong ha madan Umshaken.
Ïa katei ka lympung ïalehkai sports ki khynnah la wan ruh ban pynhap pyrda da u Bah Mayrald Born Syiem MLA ka Nongpoh kum u kongsan haka jingdon lang u Bah Hehdor Makdoh CRC ba dei peit ïaki skul ha katei ka thaiñ, Bah Iapherbak Shylla Principal, Pynroilang Shylla Rangbah Shnong bad kiwei kiwei ki riew rangbah naka thaiñ Umden ryngkat ki nonghi kai bad ki khynnah skul.
La sakhi ruh ha katei ka sngi ba naka liang ki khynnah skul kila shim bynta shitrhem haki jinglehkai sports bapher bapher naduh ka mareh relay, 100m, 200m, 400m bad kiwei kiwei bad kynthup ruh ki jingleh mass drill bad march pass.
Haba kren ha katei ka sngi kum u kongsan naka liang u Bah Mayral Born Syiem u la pynpaw ka jingsngewkmen ba ki khynnah skul kila ioh ban shim bynta shitrhem ha kitei ki 2 sngi ban pyni ïala ki jong ki sap ki phong haki jinglehkai sports bapher bapher kaba long ruh ka jingpynproh jabieng nalor ka pule ka puthi kaba ki pynlut por man ka sngi haki 4 kynroh jong ka kamra klas.
U la ong ruh ba lyngba kitei ki lympung ka long ruh kum ka rynsan ïaki khynnah skul kiba don sap ba ki ioh ban pyni ïala ki jong ki sap ki phong jong ki, ba kin ioh bad poi ruh sha ki lympung ïalehkai kiba heh, hynrei u la kyntu ruh ba kum ki khynnah skul khamtam ha kane ka juk ba mynta ba kim dei ban klet ïaka pule ka puthi kaba long kawei naki atiar ba kongsan tam ha kane ka juk stad kaba mynta.
Shuh shuh u la sneng bad kyntu ruh ïaki khynnah skul ba kin minot thop haki kot pule jong ki nalor ka sap kaba phong kaba ki don haka kam ïalehkai sports bad khamtam ïakito ki ban sa ïaleh ïaki eksamin bapher bapher ba kin pynlut khambun ka por haka jingpule jong ki khnang ba ki poi sha ka thong kumba ki angnud haka jingim jong ki bad kiar naka jingpyndonkam bakla ïaki mobile phone bad ha katei ka sngi naka liang u MLA u la aiti ruh ïaka kor komputer bad printer sha katei ka skul.
Naka liang ki bor pyniaid skul kila sam ruh ïaka khusnam sha ki nongjop haki jingïalehkai bapher bapher.
