Nongstoiñ, Ïaïong 18: Ka jingsyllad ka erïong erngit ïa ki katto katne ki bynta ha West Khasi Hills ha ka miet sngi saitjaiñ 16 tarik bad ka miet sngi u Blei 17 tarik mynta u bnai kaba la sdang naduh Rambrai, Phodumbah, Nongbodum, Nginïong haduh ki bynta jong ka Eastern West Khasi Hills.
Ha kaba ïadei bad ka jingjulor jong ki ïing u bah H.Wahlang sordar shnong Phodumbah, haba ïakren bad u nongthoh khubor mynta ka sngi, u la ïathuh ba ha ka shnong Phodumbah ki ïing kiba la julor palat bad ki bym long shuh ban shong briew ki don hynriew tylli bad ki kyrteng jong ki trai ïing ki long ka ïing jong I kong Jibalin Nongsiej, Kong Brialla Lyngkhoi, kong Memory Lyngkhoi, kong Emelin Lyngkhoi, kong Tiewïarlin Nongsiej bad ka ïing jong I kong Merista Lyngkhoi.
U la ïathuh ruh ba kitei ki ïing ki dei kiba la pra, hynrei donbok ba ym shym la don ba mynsaw. Nalor kata u la ïathuh ruh ba ki don sa sawphew tylli ki ïing kiba la julor, hynrei ki bym shym la pra lait noh tang ka jingpei ki tin sop na ka jingbom u phria haduh ba lada wan u slap, kitei ki sawphew tylli ki ïing kim long shuh ban shong briew.
Ha kajuh ka por u la ïathuh ba mynta ka sngi na ka liang jong u kum u sordar bad ki dkhot ka Executive Dorbar ki la leit ban aiti da ka jingthoh sha u Block Development Officer jong ka Mawthadraishan Block ba un leh ïa kaba donkam.
Ha kaba ïadei bad kiwei pat ki shnong kum ka Nginïong, Nongbodum bad kiwei kiwei la ïoh ban ïakren bad u bah Rostar Marbañiang, uwei na ki nongïalam shnong jong ka Nginïong, u la ïathuh ba ha ka shnong jong u baroh ki ïing kiba dang sop da ka tin kim long shuh ban shong, namar ka jing bom jong u phria ka la jur haduh katta katta.
U la ong ruh ba kiba bun ki nongshong shnong ki dei kiba im da ka rep jur, rep soh bad kiwei kiwei bad ha kine ki sngi ki jhur ki jhep ki dang sdang ban khie lung bha bad ki soh ki la sdang ban syntiew, hynrei na ka jingkhywit u phria baroh ki mar rep ki la julor lut.
Nalor kata u la ong ruh ba ki nongshong shnong kiba don bun u kba ha ki thiar hapoh ïing ruh ki la shem jingeh bha, namar ba u kba u khaw, riewhadem bad kiwei kiwei ki la jhieh. Lada jia ba u slap un dang bteng sa katto katne sngi ki nongshong shnong kin shem shitom bha ban pynrkhiang ïa u kba u khaw.
Kitei ki rangbah ki la kyntu ruh ïa ki briew jong ka sorkar, ba kin wan jurip noh kloi bad ban shim jingkheiñ bniah ïa ki jingjulor bad ka jingduh jong ki nongshong shnong, khnang ba lada ka sorkar kan mang ïa ki jingïarap kan long ryntih kat kum ka jingkwah jong ki paitbah kiba shah pynjulor.
