Nongstoiñ, Ïaiong 18: Ka FKJGP Mawshynrut Circle ha ka jingïalam jong u bah Eveningstar Marthong General Secretary ryngkat ki dkhot ka lah ïoh ban leit ai jingïarap na ka bynta ka lanot pluh ïing ka kong Pioris Tynhiang kaba la jia katei ka jingpluh ïing ha ka 14 tarik shiteng synñia ha ka Shnong Mawdongkïang West Khasi Hills.
Ka seng ka la ïoh ban ïarap da ki tin sop ïing, ki jaiñ blanket, khaw bad pisa. Ka kong Pioris Tynhiang ka dei tang ka riew kynthei kaba u lok jong ka u lah khlad lah kham slem. Kiba don mynta ki dei tang ka kmie bad kawei ka khun kynthei bad ha kane ka jingbam duh ka ding, ki khlem ïoh ei ei shuh wat tang khyndiat. Pynban ka long kaba donbok ba ki briew ki shu lait na ka jingmynsaw da kaba wan ïarap ki para ba ïa sah marjan.
Ka seng ka kyntu bad kyrpad ïa ki bor sorkar ba kan shimkhia ban pynïoh ki lad jingïarap na ka bynta katei ka lanot. Ha kajuh ka por ka kyntu lem ïa kiwei ruh ki NGO bad ki riew shimet ba kin ïakner lem ki jingïarap na ka bynta kane ka jingjia, ong ka kyrwoh na u bah Eveningstar Marthong
