Nongstoiñ, Ïaiong 18: Imat kumba ka long hi, u Drok ha Nongstoiñ u la nang jyllei watla hapdeng ka jingïakhun tyngeh jong ki bor shnong bad bor pulit ban teh lakam. Dang hynne nohphai sngi ka kynhun ba kyrpang jong ki pulit hadien ka jingbuddien, ki la ïohkem ban kem ïa ki ar ngut ki snar dih bad nongkhaïi drok na ka dong Mawbyrshem New Nongstoiñ.
Kine ki ar ngut ki dei kiba la tip kyrteng u Pynskhem Lyngdoh Nonglait na Mawbyrshem bad u Bankyntiew Wanniang na Nongkhlaw. La ong ba ki pulit ka ANTF ki la ïoh kurup kumba kumba 22 gram u drok. Hadien ba la ïohkem ki la kem noh ïa kine ki ar ngut bad pynngat ruh ha ki kyndon aiñ jong ka NDPS Act bad ka jingtohkit ka dang iaid shakhmat.
