Ka nongbah Shillong tang shupoi ka por long skul, khamtam lei lei naduh ka por 8:00 baje mynstep ka mad beit ia ka dheng kali kaba jur kaba la buh ha ka jingeh kaba khraw ïa ki nongleit nongwan la ka long naduh kiba wan na ki thaiñ Ri Bhoi, thaiñ Jowai, thaiñ Sohra bad ruh na ki bynta jong ka West Khasi Hills kaba la poi haduh u pud ba ki paidbah ki hap ban pynlut bun kynta ba kin poi sha ki kam ki jam jong ki.
Ka thaiñ Laitumkhrah bad ki bynta ban leit sha Khyndailad ki dei ki jaka kiba shah ktah tyngeh namar kadei ka jaka pdeng kaba ki nongleit nongwan ki bun bha. Ha Laitumkhrah lei lei tang shu poi kitei ki por, la lynguh hi pum namar baroh baroh ki kali ki iabeh por ban poi sha skul. Lah ruh ban kynnoh ba ka daw ka jingjur palat ka dheng kali ha ki bynta jong ka Laitumkhrah kadei namar ba baroh baroh ki leit ban buh skul da ki kali lajong kaba mut lada don 1000 ngut ki khynnah skul ki kali ruh kin don 1000 tylli kiba wan buh skul.
Kane ka dheng kali lehse lah ban ong ba kadei na ka jingnang bun ki kali bad ruh na ka daw ka jingbym don shuh ki jaka pynïeng kali kiba biang ha kylleng ki bynta jong ka nongbah.
Ka por ka dawa ba ka sorkar ka la dei ban pyrshang noh da ki lad ki lynti kumno ban wanrah noh da ki fly-over ha kito ki jaka ba kham jur ka dheng kali khamtam eh ha ki jaka ba kham long pdeng kum ha ki bynta jong ka Barik, Jingkieng Mawlai bad ruh wat ha ki bynta jong ka Umshyrpi. Kaba kham pynisih eh kadei ba ha ki por ba don ka dheng kali, wat ki ambulance ba ïaid ruh ki shem jingeh ban ïoh rung napdeng.
Na ka liang ka sorkar kam dei shuh ban pynslem hynrei ka la dei ban buh kham bun ki jaka pynïeng kali kiba kham kylluid bad ruh ban pyrshang pyntreikam noh da ki school bus ha kito ki jaka ba jur dheng kali.
Kan ym don jingmut ban pynheh ïa ka surok pajih na sor lada ki surok hapoh ka nongbah pat ki long kiba rit bad kiba khim. Donkam ruh ïa ki bor ba dei peit ba kin shimkhia wat ban pynkynriah noh ïa ki ïewdie lang pajih na pdeng sor. Lehse da kaba leh kumta, ka jingrung ki kali heh ba kit ïa ki mar rep kin ym donkam shuh ban rung shapoh Ïewduh hynrei beit beit sha kito ki jaka ba la buh kyrpang.
Lah ruh ban ong ba ka jingdon tang kawei ka jaka ba long ïew kumba long ha Ïew Themawlong bad ha Khyndailad kadei ka dawbah kaba pynlong ïa ka dheng kali kaba jur namar baroh la shu ïa poi lut hajuh. Jin lada ka long kaba lah ba ïa ki ïew jhur ïew doh lane ki ïew jain ïew nep kin long ha ki jong ki jong ki jaka khlem artatien kata ruh kan ïarap ïa ka dheng kali, bad kan weng ruh ïa ka jingeh kaba ki paidbah ki ju ïakynduh na ka por sha ka por halor kane ka jingdheng kali ha Nongbah Shillong.
Hynrei kane baroh baroh ka shong eh ha ka jingshemphang bad ka jingstad jong ka sorkar kumno ka kan leh ryngkat ryngkat ka jingïatrei lang ruh bad ka District Council bad ruh ka Hima Mylliem namar lada tang ka sorkar marwei hi kan ym lah ban leh ei ei ruh ban weng ïa kane ka sohkyrdot.
