Tyrwa ka KAS ïa ka Sorkar Jylla ban ai jingbit ban thoh bad pule da ka ktien Khasi haduh Class-XII

Shillong, ïaïong, 16: Ka Khasi Author Society (KAS) ka la pynpaw ïa ka jingangnud ba ka kan sa phah da ka jingthoh sha ka Sorkar Jylla ba kan ai jingbit ïa ki skul kiba don hapoh rilum Khasi bad Jaiñtia ba kin pule noh da ka Ktien Khasi ïa baroh ki sobjek ha ki skul haduh ka kyrdan Pule Class-XII.
Ka Khasi Author Society ka dei ka kynhun ki stad ki jhad na kane ka jylla kaba la phah ïa ka jingdawa sha ka Sorkar India ba kan ai jingmynjur noh na ka bynta ban pynrung ïa ka ktien Khasi ha ka Khyrnit Baphra hapoh ka Riti Synshar ka ri India.
Ka Ingdorbar Thawaiñ jong ka Jylla Meghalaya ha u Nailur, 2018 ka la mynjur ïa ka rai ban tyrwa ïa ka Sorkar India ban pynrung noh ïa ka Ktien Khasi bad Garo ha ka Khyrnit Baphra jong ka Riti Synshar ka ri India.
Ïa kine ki ar tyli ki jait ktien la kren, la sngewthuh bad la pyndonkam da palat 23 lak ngut ki Khasi bad Garo bad ki dei ruh ki ar tylli ki jait ktien ba la mynjur kum ki Associate Official Languages hapoh kane ka jylla.
Ha Meghalaya ki don 14 lak ngut kiba kren ïa ka ktien Khasi bad palat 9 lak ngut kiba kren ïa ka ktien Garo katkum ka Khanasamari jong u snem 2011.
Naduh ki snem 1900, ïa ka ktien Khasi la ithuh da ka Calcutta University kum ka sobjek pule ha ka Entrance Level bad Degree Level naduh u snem 1919, katba ïa ki Scholars hapoh ka North Eastern Hill University (NEHU) la ai jingbit ban thoh ïa ki Thesis bad ki Dissertations ha ka ktien Khasi naduh u snem 1081.
Ïa ka ktien Garo, ka Calcutta University ka la ithuh kum kawei na ki Modern Indian Languages haduh ka kyrdan Matriculation ha u snem 1923 katba ka Gauhati University ka la ai jingithuh ha u snem 1947 bad ha ka skulbah NEHU la pynrung ïa kane ka ktien ha u snem 1996.
“Na ka Khasi Author Society (KAS) ngi kwah ban thoh sha ka Sorkar Jylla ba dei ban ai jingbit noh na ka bynta ban hikai da ka Ktien Khasi haduh Class-X bad lehse haduh Class-XII,” ong u President ka Khasi Author Society (KAS) Dr. DRL Nonglait haba ïakren bad u nongthoh khubor dang shen.
“Lada hikai da ka Khasi ïa ka sobjek Science kan dei ka sobjek kaba suk tam namarba ka jingeh jong ki khynnah skul ha Meghalaya ka dei ka ktien namarba ngi hap ban pule da ka ktieng nongwei, (ktien Phareng),” u la ong.
Haba ai nuksa ïa kiwei pat ki jaidbynriew ki kham kiew shaphang ha ka thoh ka pule na ka jingïohlad ban thoh bad pule ha ka ktien lajong, u Dr. Nonglait, u la ong, “kum kiwei kiwei ki khynnah kiba pule da ka ktien lajong, ki Assamese bad ki Bengali ki suk. Ngi pat ba ngi hap ban pule da ka ktien nongwei (ktien Phareng) ka shem shitom. Haoid, ngi donkam shisha ban nang bun jait ki ktien.”
U la ong, “mynta lei lei ngi donkam ban ïoh jinghikai da ka ktien lajong haduh ka Degree Course bad ktien Khasi mynta ka la roi bha bad kam don jingeh ïa ngi ban hikai da ka ktien Khasi ïa ki sobjek bapher bapher haduh Class-X lada ka Sorkar jylla ka mon ban leh kumta.”
“Ngim don jingeh ban pynkylla ktien ïa ki sobjek. Ha NEHU ngi don ïa ki Khasi kiba hikai ha ka Law, ha ka Science, ha ka Arts, Humanities bad kiwei kiwei ki tnat Pule bad ngi don lut ïa ki nonghikai kiba tbit bad kam don jingeh satia lada ka Sorkar ka pynrung ïa kano kano ka sobjek ha kano kano ka jingpule,” u la ong.