Shillong, Ïaiong 16: Ka Bharatiya Janata Party (BJP)-Meghalaya Pradesh kala dawa ïa ka Sorkar Meghalaya Democratic Alliance (MDA) ban sei madan ïa ka audit report halor ki kam jyrsieh hapoh ka Jaintia Hills Autonomous District Council (JHADC) bad Garo Hills Autonomous District Council (GHADC).
Haba pynpaw ïa ka jingbym sngewtynnad ïa ka jingpynslem ban sei madan ïa ka kaiphod, u President ka BHP Meghalaya Bah Ernest Mawrie ula dawa ba ka Sorkar ka dei ban sei madan ïa kane ka kaiphod audit hapoh u bnai Jymmang lem kumta ka BJP kan shim ïala ka sienjam ban leh eiei.
U Bah Ernest u sngew ba wat hapdeng ki jingkyrpad kiba bunsien, ka Sorkar kam shym la lah ban leh eiei halor kane ka jingdawa jong ka BJP.
Lah ban kdew hangne ba ka BJP kala dawa ban thung da ka jingtohkit jong ka Central Bureau of Investigation (CBI) halor ka jingkynnoh pyndonkam bakla ïa ka song pisa ba kot da ki klur tyngka hapoh ka GHADC bad JHADC kaba la ai da ka Sorkar Pdeng lyngba ka Special Assistant Grant (SAG).
Hynrei ka Sorkar Jylla kala hukum ban phah leh da ka audit ïa ïa rukom pyndonkam ka GHADC ïa ka song pisa kaba long naduh u snem 2015 haduh 2020.
